މާލޭގެ އިމާރާތެއްގެ ނުވަވަނަ ފަންގިފިލާއިން 21 އަހަރުގެ ހައްވާ ޔުމްނާ ވެއްޓުނު ހާދިސާއާ ގުޅިގެން ތަޙުޤީޤަށް ނުފޫޒު ފޯރުވިކަމުގެ ތުހުމަތު ކުރެވިފައިވާ ޓްރާންސްޕޯޓް މިނިސްޓަރު މުޙައްމަދު އަމީނުގެ އިތުބާރު ނެތްކަމުގެ ވޯޓު މިއަދު ބޭއްވުނު މަޖިލިސް ޖަލްސާގައި އިތުބާރު ނެތްކަމަށް ފާހެއް ނުވިއެވެ.
އިދިކޮޅު އެމްޑީޕީން ހުށަހެޅި މި ވޯޓުގައި ރައްޔިތުންގެ މަޖިލީހުގެ 54 މެންބަރުން ވަނީ ޓްރާންސްޕޯޓް މިނިސްޓަރުގެ އިތުބާރު އޮތްކަމަށް ވޯޓުދީފައެވެ. މިނިސްޓަރުގެ އިތުބާރު ނެތްކަމަށް ވޯޓުދިނީ އެންމެ 11 މެންބަރުންނެވެ.
މި މައްސަލަ ހުށަހެޅުއްވި ގަލޮޅު ދެކުނު ދާއިރާގެ މެންބަރު މީކާއިލް ނަސީމް ވަނީ، ޙާދިސާ ހިނގުމުގެ ކުރިން މިނިސްޓަރު ދިރިއުޅުއްވާ މާންދޫގޭ ދެކުނު ބައިގައި ބަޔަކު މަސްތުވާތަކެތި ބޭނުންކޮށް ޤާނޫނާ ޚިލާފު ޢަމަލުތަކެއް ހިންގާފައިވާ ކަމަށް ތުހުމަތުކުރައްވާފައެވެ. އަދި މި މައްސަލައިގައި ފުލުހުން މިނިސްޓަރުގެ ގޭގެ ނަން ހާމަނުކޮށް، އެގެ ބަލާ ފާސްކުރިކުރުމާ ގުޅޭ މަޢުލޫމާތު ސިއްރުކުރަން މަސައްކަތްކޮށްފައިވާ ކަމަށްވެސް މީކާއިލްގެ މައްސަލައިގައި ފާހަގަކޮށްފައިވެއެވެ.
މިނިސްޓަރު މުޙައްމަދު އަމީން ވަނީ މަޖިލީހުގެ ޖަލްސާގައި މި ތުހުމަތުތަކަށް ޖަވާބުދާރީވެފައެވެ. މިނިސްޓަރު ވިދާޅުވީ މީކާއިލް ކުރައްވާފައިވާ ތުހުމަތުތަކުގައި ޒައްރެއްގެ މިންވަރުގެ ޙަޤީޤަތެއްވެސް ނެތް ކަމަށެވެ. މި ތުހުމަތުތަކަށް މިނިސްޓަރު ވަނީ ފުރިހަމައަށް އިންކާރުކުރައްވާފައެވެ.
ވޯޓުގެ ނަތީޖާއާ އެކު، ޓްރާންސްޕޯޓް މިނިސްޓަރު މުޙައްމަދު އަމީން މަޤާމުގައި ދެމިހުންނަވާނެއެވެ.
ކޮމެންޓު ފޮނުވާ