ޞިއްޙީ ޚިދުމަތްތައް ރަނގަޅުކުރުމަށްޓަކައި 24 ރަށެއްގައި އަލަށް ހޮސްޕިޓަލު އެޅުމުގެ މަސައްކަތް ފެށުމާއެކު، މިއަހަރުގެ ތެރޭގައި އިތުރު 90 ރަށެއްގައި ޕްރޮޖެކްޓުތައް ހިންގާނެކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް މިއަދު ވިދާޅުވެއްޖެއެވެ.
ހެލްތު މިނިސްޓްރީން މިއަދު ބޭއްވި ރަސްމިއްޔާތެއްގައި ރ. އުނގޫފާރު ރީޖަނަލް ހޮސްޕިޓަލާއި، ގދ. ތިނަދޫ އަބްދުއްސަމަދު މެމޯރިއަލް ހޮސްޕިޓަލު އަދި ޅ. ނައިފަރު އަތޮޅު ހޮސްޕިޓަލުގެ ލޭބަރ ރޫމް ކޮމްޕްލެކްސް އަދި އައިސީޔޫ ތަރައްޤީކުރުމުގެ އެއްބަސްވުމުގައި ސޮއިކުރެވުނެވެ.
މިނިސްޓަރު ނާޒިމް ވިދާޅުވިގޮތުގައި ފާއިތުވި ދުވަސްތަކުގައި 10 ރަށެއްގައި ހޮސްޕިޓަލާއި 10 ރަށެއްގައި ހެލްތު ސެންޓަރުގެ އާ އިމާރާތްތަކުގެ މަސައްކަތް ސަރުކާރުގެ ކުންފުނިތަކާ ހަވާލުކޮށްފައިވެއެވެ. އެހެންކަމުން މިވަގުތު 19 ހޮސްޕިޓަލާއި 15 ޞިއްޙީ މަރުކަޒުގެ އާ އިމާރާތްތަކާއި އެތަންތަނުގެ ޖާގަ އިތުރުކުރުމަށް 21 މަޝްރޫޢެއް ކުރިއަށްދާކަމަށް އޭނާ ފާހަގަކުރެއްވިއެވެ.
"ޔަޤީންކަން އަރުވަން، ތާވަލާ އެއްގޮތަށް ކުރިއަށްދާނަމަ މިއަހަރުގެ ތެރޭގައި 24 ރަށެއްގައި އާ ހޮސްޕިޓަލު އެޅުމަށް ހަވާލުކުރެވޭނެ. މީގެއިތުރުން ފަސް ޞިއްޙީ މަރުކަޒާއި ޞިއްޙީ ޚިދުމަތްދޭ ތަންތަނުގެ ޖާގަ އިތުރުކުރުމުގެ 60 މަޝްރޫޢެއް މިއަހަރު ކުރިއަށްގެންދާނެ" މިނިސްޓަރު ވިދާޅުވިއެވެ.
މިނިސްޓަރު ނާޒިމް އިތުރަށް ވިދާޅުވީ ރައީސުލްޖުމްހޫރިއްޔާގެ މުހިންމު ތަޞައްވުރަކީ އަތޮޅުތަކުގެ ޞިއްޙީ ޚިދުމަތް ފުޅާކޮށް، ޚާއްޞަކޮށް ރީޖަނަލް ހޮސްޕިޓަލްތައް ޓާޝަރީ ފެންވަރަށް ބަދަލުކުރުންކަމަށެވެ. "އެތަންތަނުގައި ސަބް-ސްޕެޝަލިޓީގެ ޚިދުމަތްތައް ތަޢާރަފްކުރަންޖެހޭ. މިގޮތުން ނެފްރޮލޮޖީ، ކާޑިއޮލޮޖީ، ކެތު ލެބު ފަދަ ޚިދުމަތްތައް ލިބޭނެގޮތަށް ޓާޝަރީ ފެންވަރަށް އެތަންތަން ތަރައްޤީކުރެވިގެންދާނެ" އޭނާ ވިދާޅުވިއެވެ.
މިނިސްޓަރު ނާޒިމް ވިދާޅުވިގޮތުގައި ހޮސްޕިޓަލުތައް ޓާޝަރީ ފެންވަރަށް ބަދަލުކުރުމުގެ މަސައްކަތް ކުރިއަށްގެންދާނީ ދެ ފިޔަވައްސަކަށް ބަހާލައިގެންނެވެ. މިހާރުވެސް ޖާގަ އިތުރުކުރުމާއި ޚިދުމަތްތައް ފޯރުކޮށްދިނުމަށް ބޭނުންވާނެ މުވައްޒަފުން ހޯދުމުގެ މަސައްކަތް ފަށައިފައިވާކަމަށް އޭނާ ފާހަގަކުރެއްވިއެވެ.
ކޮމެންޓު ފޮނުވާ