އައިޖީއެމްއެޗުގައި ޑޮކްޓަރަށް ދެއްކުމަށް އެދޭ ފަރާތްތަކަށް ކުރިމަތިވާ ކިއުގެ މައްސަލަ ހައްލުކުރުމަށް ހަވީރު ވަގުތުގައިވެސް އޯޕީޑީ ހިދުމަތް ދެވޭނެ ގޮތަށް ހަމަޖެއްސުމުގެ މަޝްވަރާތަކެއް ކުރަމުންދާ ކަމަށް ހެލްތު މިނިސްޓަރ އަބްދުﷲ ނާޒިމް ވިދާޅުވެއްޖެއެވެ.
ދިވެހިރާއްޖޭގެ އަޑުގެ ޕްރޮގްރާމެއްގައި އިއްޔެ ވާހަކަފުޅު ދައްކަވަމުން މިނިސްޓަރ ނާޒިމް ވިދާޅުވީ، އައިޖީއެމްއެޗުގެ ހިދުމަތްތައް ފުޅާކުރުމަކީ މި ސަރުކާރުން އިސްކަންދޭ ކަމެއް ކަމަށެވެ. ނަމަވެސް މިނިސްޓަރ ފާހަގަކުރެއްވި ގޮތުގައި ބަލިމީހުންގެ އަދަދު ގިނަވެފައި، އެއާ އެއްވަރަށް ޑޮކްޓަރުންނާއި ވަސީލަތްތައް ލިބެން ނެތުމުގެ ސަބަބުން ކިއު ދިގުވުމަކީ މި ވަގުތު ދިމާވެފައިވާ ގޮންޖެހުމެކެވެ.
"އަޅުގަނޑުމެންނަށް ފާހަގަކުރެވިފައިވާ ގޮތުގައި އައިޖީއެމްއެޗުގެ ހަތަރު ނުވަތަ ފަސް ޑިޕާޓްމަންޓެއްގައި ކިއު ދިގުވުމުގެ މައްސަލަ އެބަހުރި. މިކަން ހައްލުކުރުމަށްޓަކައި އަޅުގަނޑުމެން މިހާރު މަޝްވަރާ ކުރަމުން މިދަނީ ހަވީރު ގަޑީގައި އައިޖީއެމްއެޗްގެ އޯޕީޑީ ހިދުމަތް ދެވޭނެ ގޮތަކާ ބެހޭގޮތުން. މިކަމާ ގުޅޭގޮތުން ކަމާބެހޭ ފަރާތްތަކާއެކު މަޝްވަރާތައް ކުރިއަށް އެބަގެންދަން،" މިނިސްޓަރ ނާޒިމް ވިދާޅުވިއެވެ.
މިނިސްޓަރ އިތުރަށް ފާހަގަކުރެއްވި ގޮތުގައި ޑޮކްޓަރުންނަށް އިތުރު އިންސެންޓިވްސް ނުވަތަ މުސާރައިގެ އިތުރު އެލަވަންސްތައް ދީގެން މިފަދަ ހިދުމަތްތައް ފުޅާކުރުމުގެ މަޝްވަރާތައްވެސް ކުރަމުން ގެންދަވާ ކަމަށް ވިދާޅުވިއެވެ.
މި ސަރުކާރު އައުމަށްފަހު އަތޮޅުތެރޭގެ ހޮސްޕިޓަލްތަކުގައި ސްޕެޝަލިސްޓުންނަށް ދެއްކުމަށް ހެނދުނާއި ހަވީރުވެސް ޚިދުމަތް ލިބޭނެ އިންތިޒާމު ހަމަޖައްސާފައިވާ ކަމަށް މިނިސްޓަރ ނާޒިމް ވިދާޅުވިއެވެ. މިގޮތަށް އައިޖީއެމްއެޗަށްވެސް އެފަދަ ހައްލެއް ގެނެވޭނެ ކަމުގެ އުއްމީދު ފާޅުކުރެއްވިއެވެ.
ސަރުކާރުގެ މައި ހޮސްޕިޓަލް އިންދިރާ ގާންދީ މެމޯރިއަލް ހޮސްޕިޓަލްގެ ސީނިއަރ ޑޮކްޓަރުންނާއެކު މި މަޝްވަރާތައް ބާއްވާފައިވާ ކަމަށާއި އެ މަޝްވަރާތައް ނިމުމުން އިތުރު ގޮތްތަކެއް ހޯދައިދެވޭނެ ކަމަށްވެސް މިނިސްޓަރ ނާޒިމް ވިދާޅުވެފައިވެއެވެ.
ކޮމެންޓު ފޮނުވާ