ބައިނަލްއަގުވާމީ ދިވެހި ޑޮކްޓަރުންގެ ދުވަހާ ގުޅިގެން، ރާއްޖޭގެ ސިއްހީ ނިޒާމު ރަނގަޅު ކުރުމަށް ދިވެހި ޑޮކްޓަރުން ދެއްވާ އެއްބާރުލުމަށް ރައީސް ޑރ. މުހައްމަދު މުއިއްޒު، ޝުކުރު އަދާކުރައްވައިފިއެވެ.
18 އޭޕްރިލް، މިއަދު ފާހަގަކުރާ މި މުނާސަބަތުގައި، ރައީސް މުއިއްޒު "އެކްސް" ގައި ޕޯސްޓެއް ކުރައްވައި، ސަރުކާރުގެ އެންމެ އިސް ސިޔާސަތުތަކުގެ ތެރޭގައި ރައްޔިތުންގެ ދުޅަހެޔޮކަން ހިމެނޭކަން ފާހަގަކުރެއްވިއެވެ. އަދި ސިއްހީ ޚިދުމަތް ހަރުދަނާކުރުމަށް، ސަރުކާރުން ކުރަމުންދާ މަސައްކަތުގައި ދިވެހި ޑޮކްޓަރުން ދެއްވާ މަޝްވަރާއާއި އެއްބާރުލެއްވުމަށް ޚާއްޞަ ޝުކުރެއް އަރިސްކުރެއްވިއެވެ.
ރައީސްގެ މެސެޖުގައި، ސިއްހީ ޚިދުމަތުގެ ދާއިރާގައި މަސައްކަތްކުރައްވާ މުޅި ޢާއިލާއަށް ބައިނަލްއަގުވާމީ ދިވެހި ޑޮކްޓަރުންގެ ދުވަހުގެ ތަހުނިޔާއާއި ހެޔޮ އެދުންތައްވެސް ފޮނުއްވިއެވެ.
ރާއްޖޭގެ ސިއްހީ ނިޒާމު ހަރުދަނާކުރުމަށް ސަރުކާރުން ގިނަ މަސައްކަތްތަކެއް ކުރަމުންދާކަން ފާހަގަކޮށްލެވެއެވެ. އެގޮތުން، ރައީސް މުއިއްޒު ވަނީ ދާދިފަހުން ތެލެސީމިއާ ސެންޓަރުގެ ހާލަތު ގާތުން ބައްލަވައި، އެތަނުގެ މައްސަލަތައް ހައްލުކުރުމަށް އަވަސް ފިޔަވަޅުތަކެއް އަޅުއްވާފައެވެ.
ބައިނަލްއަގުވާމީ ދިވެހި ޑޮކްޓަރުންގެ ދުވަހަކީ ކޮންމެ އަހަރެއްގެވެސް 18 އޭޕްރިލްގައި ފާހަގަކުރާ ދުވަހެކެވެ.
ކޮމެންޓު ފޮނުވާ