ށ. އަތޮޅު ކައުންސިލުން އައިޑީކާޑު ޗާޕުކުރުމުގެ ޚިދުމަތް ފަށައިފިއެވެ. މިހާރު ށ. އަތޮޅުގެ ހުރިހާ ރަށެއްގައި ދިރިއުޅޭ ރައްޔިތުންނަށް އައިޑީކާޑު ޗާޕުކުރުމާއި އެހެނިހެން ޚިދުމަތްތައް ކައުންސިލުން ފޯރުކޮށްދެމުން ގެންދާ ކަމަށް ޑީއެންއާރުން ވިދާޅުވިއެވެ.
ރައީސް ޑރ. މުޙައްމަދު މުޢިއްޒުގެ އިންތިޚާބީ ވަޢުދުތަކުގެ ތެރޭގައި ހިމެނޭ ކަމެއްގެ ގޮތުގައި، ރާއްޖޭގެ މީހުން ދިރިއުޅޭ ކޮންމެ އަތޮޅަކުން ނުވަތަ އަތޮޅުވެރިކަން ކުރާ ރަށަކުން އައިޑީ ކާޑުގެ ޚިދުމަތް ލިބޭނެ އިންތިޒާމު ހަމަޖެއްސުން ހިމެނެއެވެ. ދާޚިލީ ވުޒާރާއިން މިހާރު އަންނަނީ އައިޑީ ކާޑުގެ ޚިދުމަތް ދިނުމަށް ބޭނުންވާ މެޝިނަރީޒް ލިބެމުންދާ ވަރަކުން އަތޮޅުތަކަށް ޚިދުމަތް ފުޅާކުރަމުންނެވެ.
ރާއްޖޭގައި ދިރިއުޅޭ ރައްޔިތުންގެ މަޢުލޫމާތު އެއްކޮށް އެއްތަނަކުން ބެލެހެއްޓުމުގެ މަސައްކަތް 1984 ވަނަ އަހަރު އައިޑެންޓިޓީ ކާޑު ޔުނިޓުން ފެށުނެވެ. އޭގެފަހުން 1993 ވަނަ އަހަރުގެ ނޮވެމްބަރު 11 ގައި އެ އޮފީހުގެ ނަން ޑިޕާޓްމަންޓް އޮފް ނޭޝަނަލް ރަޖިސްޓްރޭޝަންއަށް ބަދަލުކުރެވުނެވެ.
ޑީއެންއާރުން މުޅި ރާއްޖޭގައި 174 ކަލެކްޓިން ސެންޓަރު ޤާއިމުކޮށްފައިވާއިރު، ފުރަތަމަ ފަހަރަށް އޮންލައިންކޮށް އައިޑީކާޑު ހެދުމުގެ މަސައްކަތް ފެށީ ކޮވިޑާ ގުޅިގެން 2021 ވަނަ އަހަރުގައެވެ. 2023 ވަނަ އަހަރުގެ މާރިޗު މަހުގެ ތެރޭގައި ޑީއެންއާރުގެ އޮންލައިން ޕޯޓަލްއެއް ޤާއިމުކޮށް، ރައްޔިތުން އަމިއްލައަށް ކާޑަށް އެދި ހުށަހެޅޭނެ ގޮތް ހަމަޖެހުނެވެ. އަދި ޑީއެންއާރުން އައިޑީކާޑު ޕްރިންޓްކުރުމަށްފަހު، އެ މީހަކު ދިރިއުޅޭ ރަށެއްގެ ކައުންސިލަށް ކާޑު ފޮނުވައިދޭ ޚިދުމަތްވެސް ފޯރުކޮށްދެމުން ގެންދެއެވެ.
އަތޮޅުތެރޭގައި އައިޑީކާޑު ޕްރިންޓްކުރުމުގެ ޚިދުމަތް ފުރަތަމަ ފެށިގެން ދިޔައީ ގއ. ވިލިނގިލީގައެވެ. މިހާރު ތިނަދޫ ސިޓީގެ އިތުރުން ގދ. ގައްދޫ އަދި ށ. އަތޮޅުންވެސް މި ޚިދުމަތް ލިބެން ފަށާފައިވެއެވެ.
ކޮމެންޓު ފޮނުވާ