އެމްޑީޕީގެ ޗެއަރޕާސަން ފައްޔާޒު އިސްމާޢީލާއި ޕާޓީގެ އިސް ޚިދުމަތްތެރިންގެ މައްޗަށް ކުރަމުންދާ ދަޢުވާތަކަކީ އެމްޑީޕީގެ އަޑު ކަނޑުވާލުމަށް ހިންގާ ފިނޑި ޢަމަލެއް ކަމަށް ކުރީގެ ރައީސް އިބްރާހިމް މުޙައްމަދު ޞާލިޙު ވިދާޅުވެއްޖެއެވެ.
ރައީސް ޞާލިޙު މިފަދައިން ވިދާޅުވެފައިވަނީ އެމަނިކުފާނުގެ ޓްވިޓަރ އެކައުންޓުގައި ކުރެއްވި ޓުވީޓެއްގައެވެ. މި ޓުވީޓުގައި ރައީސް ޞާލިޙު ވިދާޅުވެފައިވަނީ ސިޔާސީ ބޭނުމަށް އެކި ނަންނަމުގައި ކުރާ މިފަދަ ދަޢުވާތަކާ ކުރިމަތިލާންޖެހުމަކީ އެމްޑީޕީއަށް އާ ކަމެއް ނޫން ކަމަށާއި، މިފަދަ ކަންކަމުން ޕާޓީ އެއްގޮތަކަށްވެސް ފަހަތަކަށް ނުޖެހޭނެކަމަށެވެ.
"އެމްޑީޕީ މިހާރު މިއޮތީ އެކަތިގަނޑެއްގެ ގޮތުގައި ބަދަހިކޮށް، ރައްޔިތުންގެ ޙައްޤުގައި ކުރާ މަސައްކަތްތައް ދެމެހެއްޓެނިވި ގޮތެއްގައި ކުރިއަށް ގެންދިއުމަށް ތައްޔާރަށް" ކަމަށްވެސް ރައީސް ޞާލިޙު ފާހަގަކުރެއްވިއެވެ.
މި ބަޔާން އައިސްފައިވަނީ އެމްޑީޕީން އެކްސްޓްރާ އޯޑިނަރީ ކޮންގްރެސްއެއް ބޭއްވުމަށް ތައްޔާރުވަމުންދާ ދަނޑިވަޅެއްގައެވެ. އެމްޑީޕީގެ އިސް އޮފިޝަލުން ހާމަކުރާ ގޮތުގައި މި ކޮންގްރެސްގެ މައިގަނޑު މަޤްޞަދަކީ ރިޔާސީ އިންތިޚާބުގެ ޓިކެޓާ ގުޅޭ މަސައްކަތްތައް ކުރުމެވެ.
ކޮންގްރެސްއަށްފަހު ބޭއްވުމަށް ހަމަޖެހިފައިވާ ޕްރައިމަރީގައި ވާދަކުރާނޭ ކަމަށް މިހާތަނަށް ބެލެވެނީ ފައްޔާޒު އިސްމާޢީލާއި ރައީސް ޞާލިޙުގެ ޓީމެވެ. އަދި ހަމަ މިއާއެކު، ކުރީގެ ރައީސް މުޙައްމަދު ނަޝީދު ވަނީ އެމްޑީޕީއާއި ދަ ޑިމޮކްރެޓްސް ޕާޓީ އެއްކޮށްލުމަކީ މިވަގުތު ޤައުމަށް އެންމެ ފައިދާހުރި ގޮތްކަމަށް ވިދާޅުވެފައެވެ. މި ޚިޔާލަށް އެމްޑީޕީގެ ޗެއަރޕާސަން ފައްޔާޒު އިސްމާޢީލް ވަނީ ތާއީދުކުރައްވާފައިކަން ފާހަގަކުރެވެއެވެ.
ކޮމެންޓު ފޮނުވާ