ފަތުރުވެރިކަމާއި ތިމާވެއްޓާ ބެހޭ ވުޒާރާއާއި ދިވެހިރާއްޖޭގެ ޤައުމީ ޔުނިވަރސިޓީއާ ދެމެދު ލ.ގަމު ކެމްޕަހުގައި ބެޗްލަރ އޮފް ސައިންސް އިން ކްލައިމެޓް ޗޭންޖް ކޯސް ހިންގުމަށް ފަހުމުނާމާއެއްގައި ސޮއިކުރެވިއްޖެއެވެ.
މި އެއްބަސްވުމުގެ ދަށުން އެންދެރި ޕްރޮޖެކްޓްގެ ފަރާތުން މި ކޯހަށް ސްޕޮންސަރޝިޕް ފޯރުކޮށްދެވޭނެއެވެ. ޤައުމީ ޔުނިވަރސިޓީން ފާހަގަކުރެއްވި ގޮތުގައި މި އެއްބަސްވުމަކީ ތިމާވެށި އެންމެ ފުރިހަމައަށް ބަލަހައްޓައި، މުސްތަޤުބަލުގެ ޖީލުތަކަށް ފޯރުކޮށްދިނުމަށް މީހުން ބިނާކުރުމަށް އެޅޭ މުހިންމު ފިޔަވަޅެކެވެ.
ޔުނިވަރސިޓީން އިތުރަށް ވިދާޅުވީ ތިމާވެށީގެ ދާއިރާއަކީ މުޅި ދުނިޔެއަށް ބަލާއިރުވެސް އެންމެ ކުރިއަރަމުންދާ އެއް ދާއިރާކަމަށާއި، އެހެންކަމުން މި ދާއިރާއިން ވީހާވެސް ގިނަ ފަރާތްތަކަށް ޢިލްމު އުނގަންނައިދިނުމަކީ މުހިންމުކަމެއް ކަމުގައެވެ.
އެއްބަސްވުމުގައި ސޮއިކުރުމަށްފަހު ބޭއްވުނު ރަސްމިއްޔާތުގައި ވާހަކަފުޅު ދައްކަވަމުން ފަތުރުވެރިކަމާއި ތިމާވެއްޓާ ބެހޭ ވުޒާރާގެ ޑިރެކްޓަރ ޖެނެރަލް މުހަންމަދު ޒާހިރު ވިދާޅުވީ، ތިމާވެށީގެ ދާއިރާއިން އެކަށީގެންވާ މީހުން ބިނާނުކުރެވި އޮތުމަކީ މިހާތަނަށް އައިއިރު ވެވިފައިވާ ބޮޑު އިހުމާލެއް ކަމަށެވެ.
"ތިމާވެއްޓާ މެދު ވިސްނާ މި ދާއިރާގެ ކަންކަމަށް ލޯހުޅުވިގެން މިދިޔައީ ވަރަށް ފަހަކުން. މިއީ ވަރަށް ބޮޑު އިހުމާލެއް ދުނިޔެއާއި މެދު އަދި ވެއްޓާއި މެދު ވެވިފައިވާ. އެކަން ރަނގަޅުކުރަން މަސައްކަތްކުރަން މިއަދު އަޅުގަނޑުމެން ޖެހޭނީ" ޒާހިރު ވިދާޅުވިއެވެ.
މި އެއްބަސްވުމުގައި ފަތުރުވެރިކަމާއި ތިމާވެއްޓާ ބެހޭ ވުޒާރާގެ ފަރާތުން ސޮއިކުރެއްވީ ޑިރެކްޓަރ ޖެނެރަލް މުހަންމަދު ޒާހިރެވެ. އަދި ދިވެހިރާއްޖޭގެ ޤައުމީ ޔުނިވަރސިޓީގެ ފަރާތުން ސޮއިކުރެއްވީ ވައިސް ޗާންސެލަރ، ޑރ. ޢާއިޝަތު ޝެހެނާޒް އާދަމެވެ.
ކޮމެންޓު ފޮނުވާ