މިފްކޯއިން މަސްވެރިންނަށް 3.2 މިލިއަން ރުފިޔާއަށްވުރެ ގިނަ ފައިސާ ދޫކޮށްފައިވާ ކަމަށް ހާމަކޮށްފިއެވެ. މިފްކޯއިން ބުނެފައިވާ ގޮތުގައި، މި ފައިސާއަކީ 29 މާރިޗު ވަނަ ދުވަހު މަސްވެރިން މިފްކޯއަށް ކިރާފައިވާ މަހުގެ އަގަށްވާ ފައިސާއެވެ. އަދި 31 މާރިޗާ ހަމައަށް ދައްކަންޖެހޭ ހުރިހާ ފައިސާއެއް ދައްކައި ނިންމާފައިވާނެ ކަމަށްވެސް މިފްކޯއިން އިތުރަށް ހާމަކޮށްފައިވެއެވެ.
މިފްކޯއިން ދެއްވި މަޢުލޫމާތުގައިވާ ގޮތުން، 29 ވަނަ ދުވަހު ޖުމްލަ 10 ދޯންޏަކުން މަސް ކިރާފައިވާ ކަމަށާއި، އެ ދޯނިތަކަށް ޖުމްލަ 320,897 ރުފިޔާ ދޫކޮށްފައިވާ ކަމަށް ބުނެފައިވެއެވެ. މިފްކޯއިން މިހާރު އަމަލުކުރަމުން ގެންދަނީ ރައީސް ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، ކިރާ މަހަށް 48 ގަޑިއިރުގެ ތެރޭގައި ފައިސާ ދެއްކުމުގެ އުސޫލުންނެވެ.
މިހާރުގެ ސަރުކާރުން މަސައްކަތް ކުރަމުންދަނީ މަސްވެރިކަމުގެ ސިނާއަތް ކުރިއަރުވައި، އެސްޓީއޯ ރޭޓުގައި މަސްވެރިންނަށް ތެޔޮ ލިބޭނެ އިންތިޒާމުތައް ހަމަޖެއްސުމަށެވެ. މިގޮތުން، މިހާރު ވަނީ ހުޅުމާލެ ކަންނެލި ޖެޓީގެ އިތުރުން، ކ. ހިންމަފުށި، ޅ. ފެލިވަރު، ގއ. ކޫއްޑޫ، އަދި ސ. ހުޅުމީދޫގައި އެސްޓީއޯ ރޭޓުގައި ތެޔޮ ވިއްކަން ފެށިފައެވެ.
މީގެ އިތުރުން، މަސްވެރިންނަށް ލުއިފަސޭހަ ގޮތްތަކެއް ހޯދައިދިނުމުގެ ގޮތުން، މަސްވެރިކަމުގެ ލޯނު ސްކީމްތައް ތަޢާރަފުކޮށް، މަސްވެރިކަމުގެ އާލާތްތައް އަގުހެޔޮކޮށް ލިބޭނެ މަގު ފަހިކޮށްދީފައިވެއެވެ. އަދި މަސްވެރިކަމުގެ ދާއިރާގައި ޒަމާނީ ޓެކްނޮލޮޖީ ބޭނުންކުރުމަށް ބާރުއަޅައި، މަސްވެރިންގެ ރައްކާތެރިކަމަށް އިތުރު ފިޔަވަޅުތައް އަޅަމުންދާކަންވެސް ފާހަގަކުރެވެއެވެ. މި ހުރިހާ ފިޔަވަޅުތަކަކީ ދިވެހި މަސްވެރިކަމުގެ ސިނާޢަތް ދެމެހެއްޓެނިވި ގޮތެއްގައި ތަރައްޤީކޮށް، މަސްވެރިންގެ ދިރިއުޅުމުގެ ފެންވަރު މަތިކުރުމަށް އަމާޒުކޮށްގެން އެޅޭ ފިޔަވަޅުތަކެކެވެ.
