މިއަންމާ އަދި ތައިލެންޑަށް ފާއިތުވި ހުކުރު ދުވަހު އައި ވަރުގަދަ ބިންހެލުމުގައި މަރުވި މީހުންގެ އަދަދު 1,700 އަށްވުރެ އިތުރުވެއްޖެ އެވެ.
މިއަންމާގެ އަސްކަރީ ވެރިކަން ބުނާގޮތުގައި، މި ބިންހެލުމުގެ ސަބަބުން 1,700 އަށްވުރެ ގިނަ މީހުން ވަނީ މަރުވެފައެވެ. މީގެ އިތުރުން 3,400 މީހުންނަށް އެކިވަރުގެ އަނިޔާތައް ލިބި، 300 އަށްވުރެ ގިނަ މީހުން ވީނުވީއެއް ނޭނގި ގެއްލިފައިވާ ކަމަށް ވަނީ ހާމަކޮށްފައެވެ. ސަރުކާރުގެ ފަރާތުން އިތުރަށް ބުނެފައިވަނީ މަރުވެފައިވާ މީހުންގެ އަދަދު އަދިވެސް އިތުރުވުމަކީ އެކަށީގެންވާ ކަމެއްކަމަށެވެ.
7.6 މެގްނިޓިއުޑްގެ ބާރުމިނުގައި އައި މި ބިންހެލުމުގެ އަސަރު ތައިލެންޑްގެ ވެރިރަށް ބެންކޮކަށްވެސް ވަނީ ކޮށްފައެވެ. ބެންކޮކުން 18 މީހުން މަރުވެ، 78 މީހުން ގެއްލިފައިވާ ކަމަށް ރިޕޯޓުކުރެވިފައިވެއެވެ. ބެންކޮކުގައި މިހާރު ވަނީ ކުއްލި ނުރައްކަލުގެ ހާލަތު އިއުލާންކޮށްފައެވެ.
މިއަންމާގެ އެކި ސިޓީތަކުގެ މަގުތައް ބޮޑަށް ހަލާކުވެ، ގިނަ އިމާރާތްތައް ބިމާ ހަމަވެފައިވާ ކަމަށް ރިޕޯޓުތަކުން ދައްކައެވެ. މީގެ ތެރޭގައި ބެންކޮކުގައި ހަދަމުންދިޔަ 30 ބުރީގެ އުސް އިމާރާތެއްވެސް ވަނީ ބިންމަތިވެފައެވެ. މިއަންމާގެ އެންމެ ބޮޑު ދެ ސިޓީން ކަރަންޓު ކެނޑިފައިވާއިރު، މިއަންމާގެ އަސްކަރީ ސަރުކާރުގެ އެދުމުގެ މަތިން ކައިރި ގައުމުތަކުން ވަނީ މީހުން ހޯދުމުގެ މަސައްކަތުގައި އެހީތެރިކަން ފޯރުކޮށްދޭން ފަށާފައެވެ.
