މިއަންމާއަށް މިއަދު ކުރިމަތިވި ބާރުގަދަ ބިންހެލުމާއި އޭގެ އަސަރުކުރި ތައިލެންޑުގައި މަރުވެފައިވާ މީހުންގެ އަދަދު 150 އަށްވުރެ މައްޗަށް އަރައިފިކަމަށް މީޑިޔާ ރިޕޯޓްތަކުން ހާމަކޮށްފިއެވެ.
އެމެރިކާގެ ޖިއޮލޮޖިކަލް ސަރވޭއިން ހާމަކުރި ގޮތުގައި މިއަންމާއަށް ފުރަތަމަ ކުރިމަތިވެފައިވަނީ 7.7 މެގްނިޓިޔުޑްގެ ބާރުމިނުގެ ބިންހެލުމެކެވެ. އޭގެ ވަގުތުކޮޅެއް ފަހުން 6.4 މެގްނެޓިޔުޑްގެ ބިންހެލުމެއްވެސް ކުރިމަތިވިއެވެ. މި ބިންހެލުންތަކާ ގުޅިގެން ދެ ގައުމުގައިވެސް ގިނަ އިމާރާތްތަކެއް ވެއްޓި، އިންފްރާސްޓްރަކްޗަރަށް ބޮޑެތި ގެއްލުންތަކެއް ލިބިފައިވެއެވެ.
މިޔަންމާގެ ދައުލަތުގެ މީޑިޔާ އެމްއާރުޓީވީން ރިޕޯޓްކޮށްފައިވާ ގޮތުން މިހާތަނަށް ބިންހެލުމާ ގުޅިގެން 144 މީހުން މަރުވެފައިވާކަން ރިޕޯޓްކޮށްފައިވެއެވެ. އަދި 732 މީހުންނަށް އެކިވަރުގެ އަނިޔާ ލިބިފައިވާކަމަށް ބުނެފައިވެއެވެ. ތައިލެންޑްގެ ވެރިރަށް ބެންކޮކުން 9 މީހުން މަރުވެފައިވާކަމަށް އެ ގައުމުގެ ފަރާތުން ބުނެފައިވެއެވެ.
މިޔަންމާގެ އަސްކަރީ ސަރުކާރުން ހާމަކުރި ގޮތުގައި ބިންހެލުމުގެ ސަބަބުން މަރުވި މީހުންގެ އަދަދު މިއަށްވުރެވެސް އިތުރުވާނެއެވެ. މި ހާދިސާއާ ގުޅިގެން ދެ ގައުމުގައިވެސް ކުއްލި ހާލަތު އިޢުލާންކޮށްފައިވާކަމަށް އެ ގައުމުތަކުން ބުނެފައިވެއެވެ.
ކޮމެންޓު ފޮނުވާ