ދިވެހިންނަކީ ހިތްހެޔޮކަމާއި އެކުވެރިކަމާއި އިޙްތިރާމާއެކު މުޢާމަލާތްކުރާ ބައެއްކަމުގައި ދުނިޔޭގެ ގިނަބަޔަކު ކިޔާ ބައެއްކަމުގައިވިއެވެ. ރީތިއަޚްލާގާއި އަދަބުވެރިކަމަކީ ދިވެހިން އެސިފަތަކަކުން ޖަރީވެ ނަލަވެފައިވާ ސިފަތަކެއްކަމުގައިވެސް ކިޔާއުޅެއެވެ. ބޭރުން އަންނަމީހުންނަށާއި ޤައުމުގެ ވެރިންނާއި ކަމުވޮށިގެންވާ މީހުންނަށާއި ދޮށީޢުމުރުގެ މީހުންނަށް ކިޔަމަންތެރި ކަމާއެކު ލޯތްބާއި އިޙްތިރާމާއެކު މުޢާމަލާތްކުރާވާހަކަ ވާހަކައަކީ ރާއްޖެއަށް ޒިޔާރަތްކުރި ބޭރުގެ ފަރާތްތަކުންވެސް ނުހަނުބޮޑަށް ފާހަގަކޮށްފައިވާ ރީތިސިފައެކެވެ.

ނަމަވެސް މިހާރަކު މިއިން އެއްވެސް ސިފައެއް ދިވެހިންގެ ނެތޭ ބުނުމަކުން އެއީ ދޮގަކަށްނުވާނެއެވެ.  ގިނަ ދެމަފިރިންނާއި ޢާއިލާގެތެރޭގައިވެސް އޮންނަނީ ދެކޮޅުވެރިކަމާއި ގޮތްދޫނުކުރުމާއި ނޭއްގާނީ ކަންތައްތަކެވެ. ޤައުމުގެ ވެރިންނާއި ކަމުވޮށިގެންވާ މީހުންނާއި ދޮށީޢުމުރުގެ މީހުންނާއި މުޢާމަލާތްކުރަނީ ތިމާއަކީ "ގައްޑާ" މީހެއްކަން އަންގަން މުޢާމަލާތްކުރާ ބީދައިންނެވެ. ރީތިބަހުން މީހުންނާ މުޢާމަލާތްކުރުމަކީ ތިމާގެދެރަކަން އަނެކާއަށް އިޙްސާސްކޮށްދޭ ކަމެއްކަހަލަ ގޮތަކަށް ހީވާކަހަލައެވެ. އަމުދުން ގިނަ ޒުވާނުން މިއަދު މިވަނީ، މިރިވެތި ދިވެހި އާދަކާދަތަކުން މަހުރޫމްވެފައޭ ބުން ދޮގަކަށް ނުވާނެކަން ކަށަވަރެވެ.

ބައެއްމީހުން ބުނާގޮތުގައި ދިވެހިންގެ އިޖްތިމާޢީ ފޭރާން ވީދިކުދިކުދިވެގެން ދިޔައީ ބަޔަކުވިސްނާނުލައި މިޤައުމަށް ގެންނަން ބޭނުންވި "ޑިމޮކްރަސީ" އާއި ޕާޓީނިޒާމްގެ ސަބަބުންނެވެ. ނުވަތަ އެބަޔަކު މިރާއްޖެއަށް ގެނައި ޑިމޮކްރަސީގެ ނިޒާމުގެ ބާވަތެއްގެ ސަބަބުންނެވެ.

ޑިމޮކްރަސީއަކީ ތިމާހިތަށްއެރިހާ އެއްޗެއް އަނެކާއާއި ދިމާލަށް ކިޔުމާއި ބޭނުންކަމެއް ކުރުންކަމަށް ގިނަބަޔަކަށް ވިސްނާދިނުމަށް ބަޔަކު ކުރިމަސައްކަތް ވަނީ ކާމިޔާބު ކޮށްފައެވެ. ޤައުމު ތަރައްޤީވެ ޤައުމުގައި ހަމަޖެހުމާއި އިންޞާފާއި އެނޫންވެސް ހުރިހާކަމެއް ފުރިހަމަވާނީ މަދުމީސްކޮޅެއް އުޅޭ ޤައުމަކަށް މިޤައުމުވިޔަސް، ޕާޓީނިޒާމް މިޤައުމުގައި އޮވެގެންކަމަށް ރައްޔިތުންނަށް ވިސްނާދިނުމަށް ބަޔަކުކުރި މަސައްކަތްވެސް ކާމިޔާބުވެ އެކަމުގައިވެސް ވަނީ ހަގީގީ ކުލަ ޖައްސާފައެވެ.

އެހެންނަމަވެސް، މިގެނެވުނު ބޮޑެތި، އަދި ދިވެހިންގެ ސަގާފަތާއި އާދަކާދަތަކާއިވެސް ބީރައްޓެހި މި ބަދަލުތަކުން، މިޤައުމަށްލިބުނީ ކުރިއެރުމެއްތޯ ނުވަތަ ކާމިޔާބެއްތޯ އެއީ ނިކަންވަރުގަދައަށް ބަހުސްކޮށްލެވިދާނެ މައުޟޫއެކެވެ.

ގޭތެރޭގެ މައްސަލަތަކުންފެށިގެން ޤައުމުގެ އެންމެބޮޑެތި މައްސަލަތަކަށް ބަލާލުމުންވެސް އެގިހާމަވެގެންދަނީ މިޤައުމުގައި މިހާރުހުރި ގިނަމައްސަލަތަކަކީ އެބުނާ "ޑިމޮކްރަސީ" އާއި ޕާޓީނިޒާމުގެ ސަބަބުން އުފަންކުރުވި މައްސަލަތަކެއްކަމެވެ.

އެވެރިން ބުނާގޮތުން މައިންބަފައިންގެ ކުރިމަތީ ޒުވާބުކޮށް ހިތަށްއެރި އެއްޗެއް ކިޔުމަކީ ޑިމޮކްރަސީގައި ދަރިންނަށް ލިބިގެންވާ ޙައްޤެކެވެ. ހައްދަވައިގެން ބޮޑެތިދޮގު ހަދައިގެން މީހުންގެ އަބުރު ކަތިލުމަކީވެސް އެފަރާތްތަކަށް ލިބިގެންވާ ޑިމޮކްރަސީގެ މިނިވަންކަމެއް ކަމަށްވެސް އެވެރިން ދަޢުވާކުރެތެވެ. ޤައުމުގެ ވެރިންނާއި އަޝްރާފުންނާއި ދޮށީޢުމުރުގެ މީހުންނާ ދިމާލަށް ހިތަށްއެރިއެއްޗެއް ގޮވައި ބޭއަދަބީގޮތަށް ކަންކަންކުރުމަކީވެސް އެފަރާތްތަކުން ބުނާގޮތުގައި ޑިމޮކްރަސީން ލިބިދޭ "މަތިވެރި" ޙައްޤެކެވެ. މުޖުތަމަޢު ބަލައިނުގަތަސް އެމީހަކު އުޅޭނެގޮތަކަށްއުޅެ ޖައްސާނެ ވައްތަރެއް ޖެއްސުމަކީވެސް އެވެރިންގެ ޑިމޮކްރަސީގެ ރީތިސިފައެކެވެ.

ދެމަފިރިން ނުވަތަ މައިންބަފައިންނާއި ދަރިން ދެޕާޓީއަކަށް ތާއީދުކުރާތީ ގޭތެރޭގައި އޮންނަންޖެހޭ ހަމަޖެހުމާއި އުފާވެރިކަން ގެއްލިފައިވަނީ ކިތައްގޭގެކަން ބުނެދޭން ނޭގުނުނަމަވެސް، މިއީވެސް އާއިލާތަކަށް ކުރިމަތިވެފައިވާ ބޮޑު ގޮންޖެހުމަކަށްވެސް، ފަސާދަވެގެން ގޮސްފައިވަނީ ކިތަންމެ އާއިލާއެކެވެ. ޢާއިލީ ގުޅުމަށްވުރެ ނުވަތަ ރަޙިމުގެ ގުޅުމަށްވުރެ ޕާޓީގެ ގުޅުން އިސްވެ، ގާތްތިމާގެކަމާއި، އެއްބަޑު އެއްބަފާކަމުގެ ގުޅުންކަޑާލާ، ހުރިހާ ކަމެއްގެ މައްޗަށް ތިމާ ނިސްބަތްވާ ޕާޓީއިސްކޮށްގެ، ދިރިއުޅުމުގެ ހަގީގީ ސަމުގާއަކީ އެއީކަމުގައި ބަލައިގެންފައިވާ މީހުން މިއަދުގެ މުޖުތަމަޢުގައި އިންތިހާއަށް ގިނަވެއްޖެއެވެ.

ޢާއިލާމީހުންނަށް ނުވަތަ މައިންބަފައިންނަށް ނުވަތަ ދަރިންނާއެކު ނުބާއްވާ ގާތްކަމާއި އެކުވެރިކަން ތިމާގެ ޕާޓީގެ މީހަކަށްވާތީ ބާއްވަނީ ޙައިރާންވާހާ ބޮޑަށެވެ. ތިމާގެ ޕާޓީ ވެއްޖިއްޔާ ޕާޓީން ކޮންމެކަމެއްކުރިޔަސް އެއްވެސް މައްސަލައެއް ނެތެވެ. ތިމާގެ ޕާޓީގެ ކެނޑިޑޭޓަކީ ކޮންމެފަދަ މީހަކަށްވިޔަސް އެމީހަކަށް ވޯޓްދިނުމަށް ފަރުވާލެއް ނޯންނައިރު ތިމާގެ އަޚާ ނުވަތަ އެޚުތާއަށްވުރެ ޕާޓީގެ ކެނޑިޑޭޓަށް އިސްކަންދެނީއެވެ. ރައްޔިތުންގެ މަސްލަޙަތާއި ގުޅުންހުރި މުހިއްމު މަޤާމްތަކަށް ތަނެއްދޮރެއް ދޮރާއްޓެއް ނޭގޭމީހާވެސް އެއީ ޕާޓީ މީހަކުނަމަ އެމީހަކަށްވޯޓްދީ އެމަޤާމަށް ގެނައުމަކީ ތިމާއަށްލިބޭ ނުހަނުބޮޑު ފަޚުރަކާއި އުފަލަކަށް ވެއްޖެއެވެ. ޢާއިލާގެ ހަމަޖެހުމާއި އުފަލަށްވުރެ ޕާޓީގެ ހަމަޖެހުމާއި އުފާވެރިކަންބޮޑުވެ ތިމާގެ ޢާއިލާތެރޭގައި ކިތަންމެ ބޮޑެތި މައްސަލަތަކެއް ޖެހުނަސް އެއީ ތިމާ ވިސްނާލަންވެސްޖެހޭ ކަމަކަށްނުވެ، ދިވެހިން ދެކުނު ހަމަޖެހުމާއި އުޚުއްވަތްތެރިކަމުގެ ޒަމާން މާޒީވެ ހިގައްޖެއެވެ.

ކަންކަން މިހާރު މުޖުތަމަޢުގައި ހިގަމުންދާގޮތުން، ގިނަބަޔަކު މިއަދު ބުނަމުންދަނީ މުޖުތަމަޢުގައި އުފެދިފައިވާ ގިނަ މައްސަލަތަކުގެ އަސްލަކީ، ޑިމޮކްރަސީއަކީ ކޯޗެއްކަން ނޭގޭބައެއްގެ ތެރެއަށް، އެބުނާ ޑިމޮކްރަސީއެއް ގެނައުމާއި ޕާޓީނިޒާމް ތައާރަފް ކުރުމެވެ.

ދުނިޔޭގެ އެންމެ ކުރިއަރާފައިވާ ޤައުމުތަކުގައިވެސް، ހޭލުންތެރި ނުހަނު ބޮޑަށް އޮތް އާބާދީތަކުގައިވެސް، ނުވަތަ ތަރައްގީ ވެފައިވާ ގައުމުތަކުގައި ދިރިއުޅެމުންދާ ރައްޔިތުންގެ މެދުގައިވެސް މައްސަލަތަކާއި، ދެބަސްވުންތަކާއި، ތަޅާފޮޅުންތައް އުފެދިގެންދާ، "ޑިމޮކްރަސީ" އާއި ޕާޓީނިޒާމް، މިޤައުމުފަދަ އާބާދީމަދު އަދި ހޭލުންތެރިކަންކުޑަ ރައްޔިތަކު ދިރިއުޅޭ މުޖުތަޢުއަކަށް ތަޢާރަފްކުރީ ރަނގަޅު ގޮތުގައި ކަމަށް މިއަދު ދެންނެވޭކަށް ނެތެވެ. އެކަމުގެ ވަގުތާއި، ހާލަތާއި، އަދި އެޑިމޮކްރަސީ ގެނައި މީހުން އެޑިމޮކްރަސީ ގެނައި ގޮތްވެސް ގޯހެވެ. އެމީހުންގެ މަގުސަދުވެސް ގޯހެވެ. އެމީހުގެ ވިސްނުން، ދިވެހި އާންމު ވިސްނުމާއި ނުހަނު ބޮޑު ތަނުން ފަތާތެވެ.

ނަތީޖާ ވަރަށް ހިއްޗެވެ. އެވޭލާޒަމާނުއްސުރެ ދިވެހިންގެމެދުގައިއޮތް ހުރިހާރީތިސިފަތަކެއް، ބަލއިގެންފައި އޮތް އިސްލާމީ ރިވެތި އެތަކެއް އުސޫލުތަކާއި އެއްބަޑު އެއްބަފާކަމުގެ މާތް ގުޅުން ގެއްލިގެން ހިގައްޖެއެވެ. ފެންނާ އޮތް ހަގީގަތަކީ، އެބުނާ "ޑިމޮކްރަސީ" އާއި އެބުނާ ޕާޓީނިޒާމަކީ މިރާއްޖެއަށް އަދިބޭނުންވާ އެއްޗެއް ނޫންކަމެވެ.

ނޯޓު: މި ލިޔުމަކީ ރައްޔިތުންގެ މަޖިލީހުގެ ތިނަދޫ އުތުރު ދާއިރާގެ ކުރީގެ މެމްބަރު ސައުދުﷲ ހިލްމީ ލިޔުއްވާފައިވާ ލިޔުއްވުމެކެވެ.