2021 ވަނަ އަހަރުގެ ހުރިހާ ދުވަހެއްގައި ކައިވެނިކޮށް ދޭން ފެމިލީ ކޯޓުން ނިންމައިފި އެވެ.
އެ ކޯޓުން ބުނީ އަންނަ އަހަރުގެ ހުރިހާ ދުވަހެއްގައި ކައިވެނިކޮށް ދޭން ނިންމާފައި ވާއިރު، ކޯޓާއި ކޯޓުން ބޭރުގައި ކައިވެނި ކުރަން ވަކި ގަޑިތަކެއް ހަމަޖައްސާފައިވާ ކަމަށެވެ. ކޯޓުގައި ކައިވެނި ކޮށްދޭނީ ރަސްމީ ގަޑީގައި ހެނދުނު 8:30 އިން 11:30 އަދި މެންދުރު ފަހު 13:00 އިން 13:45 ފެމިލީ ކޯޓުން ބުނެއެވެ. މީގެ އިތުރުން ނުރަސްމީ ގަޑީގައި ހަވީރު 4 އިން ރޭގަނޑު 9:30 އާ ހަމައަށް ވެސް ކޯޓުގައި ކައިވެނިކޮށް ދޭނެ ކަމަށް އެ ކޯޓުން ބުނެއެވެ.
ފެމިލީ ކޯޓުން ބުނީ އަންނަ އަހަރު ކޯޓުން ބޭރުގައި އާންމު އުސޫލުން ކައިވެނިކޮށް ދޭނީ ހަވީރު 4 އިން ރޭގަނޑު 9:30 އާ ހަމައަށް ކަމަށެވެ. މީގެ އިތުރުން އަހަރުގެ ވަކި ދުވަސްތަކެއްގައި ކޯޓުން ބޭރުގައި ކައިވެނި ކޮށްދޭ ގަޑިތަށް ވަނި ބަދަލު ގެނެސްފައެވެ. އެގޮތުން އަންނަ އަހަރުގެ އޭޕްރީލް 13 ވަނަ ދުވަހުން ފެށިގެން މެއި 19 ވަނަ ދުވަހުގެ ނިޔަލަށް ކޯޓުން ބޭރުގައި ކައިވެނިކޮށް ދޭން ހަމަޖައްސާފައި ވާ ގަޑިއަކީ ރޭގަނޑު 9:45 އިން 10:45 އަށެވެ. އަދި އަންނަ އަހަރު ޖުލައި، 16 ވަނަ ދުވަހުގެ ފެށިގެން ޖުލައި، 27 ވަނަ ދުވަހުގެ ނިޔަލަށް ކައިވެނިކޮށް ދޭނީ ރޭގަނޑު 8 އިން 9:30 އަށް ކަމަށް ވެސް އެ ކޯޓުން ބުނެއެވެ.
ފެމިލީ ކޯޓުން ބުނީ ރޯދަ މަހު ކައިވެނި ކޮށްދޭނެ ގަޑިތައް ފަހުން އިއުލާން ކުރާނެ ކަމަށެވެ.
މީގެ ކުރިން ބައެއް ދުވަސްތަކާ ދިމާކޮށް ކައިވެނި މަޖިލީސްތައް ނުބާއްވަން ފެމެލީ ކޯޓުން ނިންމާފައިވެއެވެ. އަންނަ އަހަރަކީ އަހަރުގެ ހުރިހާ ދުވަހެއްގައި ކައިވެނި ކޮށްދޭން އެ ކޯޓުން ނިންމި ފުރަތަމަ އަހަރެވެ.
