މިހާރު ކުރިއަށްދާ މަޖިލީހަކީ ސަރުކާރުން ބޭނުންވާހާ ގޮތަކަށް ރަބާ ސްޓޭމްޕް ޖަހާދޭނެ ތަނެއް ނޫކަން ނިމިގެން މިދާ އަހަރުގައި މަޖިލީހުން ހާމަކޮށްދީފައި ވާކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

އާ އަހަރުގެ ތަހުނިޔާ ދިވެހި ރައްޔިތުންނަށް އަރިސް ކުރައްވައި މަޖިލިސް ރައީސް ވިދާޅުވީ ނިމިގެން މިދާ އަހަރަކީ މަޖިލިސް ތެރެއިން މުހިންމު މަސައްކަތްތަކެއް ކުރެވުނު ކާމިޔާބު އަހަރެއް ކަމުގައެވެ. ކޯވިޑް-19 ގެ ދަތި ހާލުގައިވެސް މަޖިލިސް ޖަލްސާތައް ކުރިއަށް ގެންދިއުމަކީ މިއަދު ރާއްޖެއަށް ލިބިގެންދާ ކުރިއެރުމުގެ އަސްލުކަމަށް މަޖިލިސް ރައީސް ވިދާޅުވިއެވެ.

ނިމިގެން މިދާ އަހަރުގެ މަޖިލިސް މަސައްކަތްތަކަށް އިޝާރާތް ކުރައްވަމުން މަޖިލިސް ރައީސް ވިދާޅުވީ މަޖިލީހަކީ ކޮރަޕްޓު ނޫން ތަނެއްކަން ރައްޔިތުންނަށް ހާމަވެގެން ގޮސްފައިވާކަމަށެ. އަދި މަޖިލީހަކީ ސަރުކާރުން ބޭނުންވާހާ ގޮތަކަށް ރަބާ ސްޓޭމްޕް ޖަހައި ދޭނެ ތަނެއް ނޫންކަންވެސް ސާބިތުކޮށް ދީފައިވާކަމަށެވެ. މަޖިލީހުގެ މަަސައްކަތަކީ ރައްޔިތުންނާއި ގުޅުންހުރި ބިލްތަކާއި، މަސައްކަތްތައްކޮށް، ސަރުކާރު ޖަވާދީކޮށް، ޤާނޫނު އަސާސީ ނެގެހެއްޓުންކަމަށެވެ. އެކަން ނިމިގެން މިދާ އަހަރުގެ ތެރޭގައި މަޖިލީހުން ހާސިލް ކޮށްފައިވާކަމަށް މަޖިލިސް ރައީސް ވިދާޅުވިއެވެ.

މަޖިލީހުގެ މިއަހަރުގެ މަސައްކަތް ނިންމާލާފައިވާއިރު، މިއީ މަޖިލީހުގެ ތާރީހުގައިވެސް އެންމެ ގިނަ ޖަލްސާތައް ބާއްވައި، އެންމެ ގިނަ މަސައްކަތް ނިންމި އަހަރަށް ވެގެން ވަނީ ގޮސްފައެވެ. މަޖިލީހުގެ މިއަހަރުގެ 3 ދައުރުގެ މަސައްކަތްކަށް ބަލާއިރު، މިއަހަރުގެ ތެރޭގައިވަނީ 117 ޖަލްސާ މަޖިލީހުގައި ބާއްވާފައެވެ. އޭގެ ތެރެއިން 42 ޖަލްސާއަކީ ފުރަތަމަ ދައުރުގެ ޖަލްސާތަކެވެ. ދެވަނަ ދައުރުގައި 47 ޖަލްސާ އެއް ބާއްވާފައިރު، ފަހު ދައުރުގައިވަނީ 28 ޖަލްސާއެއް ބާއްވާފައެވެ.

މަޖިލީހުގެ މިއަހަރުގެ ތެރޭގައި މަޖިލީހުގެ ތަޅުމުގައާއި ކޮމިޓީތަކުގައި ކުރެވުނު މުހިންމު މަސައްކަތްތަކާއިއެކު މުހިންމު ޤާނޫނުތަކެއް ވުޖޫދަށް ގެނެސްފައިވެއެވެ. ޖިނާއީ އިޖުރާތު ޤާނޫނާއި، ތައުލީމީ ޤާނޫނާއި، ފުލުހުންގެ ޚިދުމަތުގެ ޤާނޫނާއި، ލާމަރުކަޒީ ޤާނޫނާއި، ކުޑަކުދިންގެ ހައްޤުތަކާއި ބެހޭ ޤާނޫނުފަދަ މުހިންމު ގިނަ ޤާނޫނުތަކެއް ވަނީ ބޮޑެތި އިސްލާހުތަކާއިއެކު މަޖިލީހުން ފާސްކޮށްފައެވެ.