ސަސްޕެންޑް ކުރެވިފައިވާ ސުޕްރީމް ކޯޓުގެ ފަނޑިޔާރު މަހާޒު އަލީ ޒާހިރާއި ޑރ. އަޒްމިރަލްދާ ޒާހިރުގެ އިތުރު ސުލޫކީ މައްސަލައެއް ބެލުމަށް، ޖުޑީޝަލް ސާވިސް ކޮމިޝަން (ޖޭއެސްސީ) އިން އިއްޔެ ނިންމައިފިއެވެ.
މި މައްސަލައަކީ 2022 ވަނަ އަހަރު އޮކްޓޯބަރ މަހު ހައި ކޯޓުގެ ކުރީގެ އެސިސްޓެންޓް ރަޖިސްޓްރާ ހުސައިން މުހައްމަދު ހަނީފާ ސުޕްރީމް ކޯޓުގެ އޭރުގެ ފަނޑިޔާރު ހުސްނުއްސުއޫދު "ހުތުރު ބަހުން" ވާހަކަ ދެއްކެވިކަމަށް ބުނާ މަޖިލީހުގައި މަހާޒު އާއި އަޒްމިރަލްދާ ވެސް ތިބި މައްސަލައެވެ.
ޖޭއެސްސީގެ ނިންމުމުގައި ބަޔާންކޮށްފައިވާ ގޮތުގައި، ސުއޫދު ހަނީފަށް ހުތުރު ބަހުން ވާހަކަ ދެއްކެވި މަޖިލީހުގައި މަހާޒާއި އަޒްމިރަލްދާ ތިބުމުން އެ ދެ ފަނޑިޔާރުން ވެސް ސުއޫދާ އެއްވަރަށް ޒިންމާ ނަންގަވަން ޖެހޭނެކަމަށް ޖޭއެސްސީއަށް ފެންނާތީ، އެ ދެ ފަނޑިޔާރުންގެ މައްސަލަ ބެލުމަށް ނިންމީއެވެ.
މި މައްސަލައާ ގުޅިގެން ސުއޫދުގެ މައްސަލަވެސް ބެލުމަށް ޖޭއެސްސީން ކުރިން ނިންމާފައިވީ ނަމަވެސް، އޭނާ މިދިޔަ ހަފުތާގައި ފަނޑިޔާރުކަމުން އިސްތިއުފާ ދެއްވާފައިވާތީ، އެ ކޮމިޝަނުން އަމަލުކުރާ އުސޫލުގެ ދަށުން އެ މައްސަލަ ކުރިއަށް ނުގެންދިއުމަށް ނިންމާފައިވެއެވެ.
ޖޭއެސްސީގެ ބައްދަލުވުމުގައި މި މައްސަލަ ބެލުމަށް އެއްކޮޅަށް ވޯޓު ނުދެއްވާފައިވަނީ ހައި ކޯޓުގެ ފަނޑިޔާރުންގެ ތެރެއިން ޖޭއެސްސީއަށް އިންތިޚާބު ކުރެވިފައިވާ މުހައްމަދު ނިޔާޒާއި ދަށު ކޯޓުތަކުގެ ފަނޑިޔާރުންގެ ތެރެއިން ޖޭއެސްސީއަށް އިންތިޚާބު ކުރެވިފައިވާ ފަރުހާދު ރަޝީދެވެ.
ސުޕްރީމް ކޯޓުގެ ތިން ފަނޑިޔާރުން – ހުސްނުއްސުއޫދު، މަހާޒު އަދި އަޒްމިރަލްދާ – ސަސްޕެންޑް ކުރެވިފައިވަނީ އެންޓި ކޮރަޕްޝަން ކޮމިޝަން (އޭސީސީ) އިން ބަލަމުންދާ މައްސަލައަކާ ގުޅިގެން މިދިޔަ މަހުގެ 26 ވަނަ ދުވަހުއެވެ. މި ސަސްޕެންޝަނާ ގުޅޭ މައްސަލައިގެ ތަފްސީލެއް މިހާތަނަށް ހާމަކުރެވިފައެއް ނުވެއެވެ.
އަޒްމިރާލްދާ އާއި މަހާޒުއާ ގުޅޭގޮތުން ޖޭއެސްސީން މިހާރުވެސް ދަނީ އިތުރު މައްސަލައެއް ބަލަމުންނެވެ. އެއީ ކްރިމިނަލް ކޯޓުގެ ފަނޑިޔާރަކަށް ގުޅައި ބިރު ދެއްކިކަމަށް ބުނެ އަމިއްލަ ފަރާތަކުން ހުށަހަޅާފައިވާ މައްސަލައެކެވެ.
ކޮމެންޓު ފޮނުވާ