ސުޕްރީމް ކޯޓުގެ ފަނޑިޔާރު މަހާޒު އަލީ ޒާހިރު އަދި ޑރ. އަޒްމިރާލްދާ ޒާހިރާއާ ގުޅޭގޮތުން ބަލަމުންދާ މައްސަލައާ ގުޅިގެން ދެ ފަނޑިޔާރުންވެސް ޖުޑީޝަލް ސާވިސް ކޮމިޝަން (ޖޭއެސްސީ) އަށް ހާޒިރުވުމަށް އަންގައިފިއެވެ.
ޖޭއެސްސީގެ ފަރާތުން އަޒްމިރާލްދާއަށް ހާޒިރުވުމަށް އަންގާފައިވަނީ އާދިއްތަ ދުވަހުގެ ހެނދުނު 11:00 އަށެވެ. އަދި މަހާޒަށް އެ ކޮމިޝަނަށް ހާޒިރުވުމަށް އަންގާފައިވަނީ އެ ދުވަހުގެ މެންދުރުފަހު 13:00 އަށެވެ. މި ދެ ފަނޑިޔާރުންގެ ވަކީލުން ވަނީ ނޫސްތަކަށް މިކަން ކަށަވަރުކޮށްދީފައެވެ.
ޖޭއެސްސީން ބަލަމުންދާ މައްސަލަތަކުގެ ތެރޭގައި ހިމެނެނީ މަސާޖު ޕާލާއަކުން ހައްޔަރުކުރެވުނު އަޒްމިރާލްދާގެ ފިރިކަލުން ޑރ. އިސްމާއިލް ލަތީފުގެ ބަންދާމެދު ގޮތެއް ނިންމުމަށް ފަނޑިޔާރުންނަށް ނުފޫޒު ފޯރުވިކަމަށް ބުނެވޭ މައްސަލައެވެ. ދެވަނަ މައްސަލައިގެ ތަފްސީލް މިހާތަނަށް ހާމަކޮށްފައެއް ނުވެއެވެ.
އަޒްމިރާލްދާގެ ވަކީލު އިބްރާހިމް ޝަމީލް ނެރުއްވި ނޫސްބަޔާނެއްގައި ވިދާޅުވެފައިވަނީ، އަޒްމިރާލްދާއަށް ކުރެވޭ ތުހުމަތުތަކަކީ ދޮގު ތުހުމަތުތަކެއް ކަމަށާއި، ސުލޫކީ މައްސަލައެއް ނެތް ހާލަތެއްގައި މައްސަލަ ބަލަމުންދާކަމަށެވެ. އަދި އަޒްމިރާލްދާ ސަސްޕެންޝަންގައި ހުންނަތާ ހަފްތާއަކަށްވުރެ ގިނަ ދުވަސްވީއިރުވެސް ބަލަމުންދަނީ ކޮން މައްސަލައެއްކަން އަދިވެސް އަންގާފައިނުވާކަން ފާހަގަކުރައްވާފައިވެއެވެ.
ފަނޑިޔާރު ހުސްނުއްސުއޫދުގެ މައްސަލައާ ގުޅިގެންވެސް ޖޭއެސްސީން މައްސަލަ ބަލަން ފަށާފައިވާއިރު، މައްސަލަތައް އިތުރުވުމާ ގުޅިގެން ސުއޫދު ވަނީ މަޤާމުން އިސްތިއުފާ ދެއްވާފައެވެ. އިސްތިއުފާގެ ސިޓީ އެންމެ ފުރަތަމަ ރައީސް އޮފީހަށް ފޮނުއްވި ނަމަވެސް، ފަހުން ޖޭއެސްސީއަށްވެސް ފޮނުއްވާފައިވެއެވެ.
ސުއޫދުގެ އިސްތިއުފާގެ ސިޓީގައި ވިދާޅުވެފައިވަނީ، ސަރުކާރުން ޤާނޫނު އަސާސީއާ ޚިލާފަށް ރާއްޖޭގެ އަދުލު އިންސާފުގެ ނިޒާމަށް ނުފޫޒު ފޯރުވަމުންދާކަމަށެވެ. އަދި ސުޕްރީމް ކޯޓަށް ހުށަހެޅިފައިވާ މައްސަލައެއް ރައީސް އެދިވަޑައިގަންނަވާ ގޮތަށް ނިންމުމަށް ކޯޓުގެ ހުރިހާ ފަނޑިޔާރުންނަށް ބިރު ދައްކަމުންދާކަމަށް ތުހުމަތުކުރައްވާފައިވެއެވެ.
ކޮމެންޓު ފޮނުވާ