ޖުޑިޝަލް ސާވިސް ކޮމިޝަން (ޖޭއެސްސީ) އިން ސަސްޕެންޑް ކުރި ސުޕްރީމް ކޯޓުގެ ތިން ފަނޑިޔާރުން ކޯޓުގެ ވޮޓްސްއެޕް ގްރޫޕުން ނިކުމެއްޖެއެވެ.
އެނގިފައިވާ ގޮތުގައި، ޑރ. އަޒްމިރާލްދާ ޒާހިރު، މަހާޒު އަލީ ޒާހިރު އަދި ހުސްނުއްސުއޫދު މިހާރު ވަނީ ސުޕްރީމް ކޯޓުގެ ފަނޑިޔާރުންގެ ވޮޓްސްއެޕް ގްރޫޕުން އަމިއްލައަށް ނިކުމެވަޑައިގެންފައެވެ.
ޖޭއެސްސީން ނެރުނު ބަޔާނެއްގައި ބުނެފައިވާ ގޮތުން، އެންޓި-ކޮރަޕްޝަން ކޮމިޝަން (އޭސީސީ) އިން މި ފަނޑިޔާރުންނާ ގުޅޭ ޖިނާއީ ތަޙުޤީޤެއް ކުރަމުންދާކަން އެންގުމާ ގުޅިގެން އެ ފަނޑިޔާރުން ސަސްޕެންޑް ކުރުމަށް ނިންމާފައިވެއެވެ.
މި ތިން ފަނޑިޔާރުން ސަސްޕެންޑް ކުރެވިފައިވަނީ ސުޕްރީމް ކޯޓުގައި މުހިންމު މައްސަލައެއްގެ އަޑުއެހުމެއް ތާވަލުކުރެވިފައިވަނިކޮށެވެ. އެއީ ޕާޓީން ވަކިކުރުމުން މަޖިލީހުގެ ގޮނޑި ގެއްލޭ ގޮތަށް ޤާނޫނުއަސާސީއަށް ގެނެވުނު ބަދަލު ބާޠިލުކުރުމަށް އެދި ކެންދޫ ދާއިރާގެ ކުރީގެ މެންބަރު އަލީ ހުސެއިން ހުށަހެޅި މައްސަލައެކެވެ.
ކޯޓުތަކުގެ ޤާނޫނުގައިވާ ގޮތުން، ސުޕްރީމް ކޯޓުގައި ދުސްތޫރީ މައްސަލައެއް ބެލުމަށް މަދުވެގެން ފަސް ފަނޑިޔާރުން ތިބެންޖެހެއެވެ. މި މައްސަލަ ބަލަމުން ދިޔައީ ހަތް ފަނޑިޔާރުންގެ ފުލް ބެންޗަކުންނެވެ. ތިން ފަނޑިޔާރުން ސަސްޕެންޑް ކުރުމާއެކު، މި ޝަރުތު ފުރިހަމަނުވާތީ، މައްސަލަ ކުރިއަށް ގެންދިއުމަށް މިވަނީ ހުރަސްއެޅިފައެވެ.
