ރާއްޖޭގައި އިއުލާން ކޮށްފައިވާ އާންމު ޞިއްޚަތުގެ ކުއްލި ނުރައްކަލުގެ ހާލަތު މިފަހަރު ހަމަވާ މުއްދަތާއިއެކީ އުވާލާނެކަމަށް އުންމީދު ކުރާ މީހުން މަދެއްނޫނެވެ. އެންމެ ބޮޑު ސަބަބަކީ ރާއްޖެއިން ކޯވިޑްގެ ކޭސްތައް މަދުވެ، ބަލި ކޮންޓްރޯލް ކުރެވޭފަދަ ހާލަތެއްގައި ރާއްޖެ އޮތުމެވެ. ނިމިގެން މިދާ އަހަރުގެ އެންމެ ފަހު މަހުގެ ތެރޭގައި ރާއްޖެއިން ކޯވިޑް ޖެހޭ މީހުންގެ ނިސްބަތް އެވްރެޖު ކޮށް ދުވާލަކު އުޅެނީ 20 އަށް ވުރެ ދަށުގައެވެ.
ކޯވިޑްގެ ނުރައްކާ އޮތް މިންވަރު ކުޑަކުރެވޭތީ އަޅާފައިވާ ފިޔަވަޅުތަކަށް މަޑުމަޑުން އެޗްޕީއޭއިން ދިޔައީ ލުއިދެނުންނެވެ. އެގޮތުން މާލެ ވިލިމާލެ އަދި ހުޅުމާލެ ހިމެނޭ ސަރަހައްދުގައި އެއްގަމު އުޅަނދުފަހަރު ދުއްވުމާއި، މަގުމައްޗާއި އާންމު ތަންތަނަށް ނުކުތުން މަނާކޮށް ޢިއުލާންކުރި ކާފިއު ވަނީ މިަހުގެ 19 ވަނަ ދުވަހު އުވާލާފައެވެ.
މީގެ އިތުރުން 14 ދުވަހުގެ ކަރަންޓީނުގެ މުއްދަތު 10 ދުވަހަށްވަނީ ކުޑަކޮށްފައެވެ. އަދި ރާއްޖެއިން ބޭރުގައި ތިބި ދިވެހިންގެ ތެރެއިން ނެގެޓިވް ޕީސީއާރު ޓެސްޓެއް ހިފައިގެން އަންނަ އެއްވެސް ދިވެއްސަކު ރާއްޖެ އައިސް ކަރަންޓީނު ވާން ނުޖެހޭގޮތަށްވެސް ވަނީ ބަދަލު ގެނެސްފައެވެ. މިހުރިހާ ލުއިތަކާއިއެކު ޞިއްޚީ ކުއްލި ނުރައްކަލުގެ ހާލަތު އުވާލާނެކަމަށް ވަރަށް ގިނަ ބަޔަކު ދަނީ އިންތިޒާރު ކުރަމުންނެވެ. ނަމަވެސް އަނެއްކާވެސް ކޯވިޑްގެ ދެ ތިން ވޭރިއަންޓެއް ދުނިޔޭގެ އެކި ޤާއުމުތަކުން ފެނި ބަލީގެ ނުރައްކާ އަނެއްކާވެސް މިވަނީ ބޮޑުވެފައެވެ.
އިނގިރޭސިވިލާތުން އެންމެ ފުރަތަމަ ފެނުނު މި ވޭރިއަންޓަކީ ކޯވިޑް ވައިރަސްގެ އާވައްތަރަކަށްވާއިރު، މިއީ ކުރިއަށްވުރެ ފަސޭހައިން ގައިންގަޔަށް އަރާ ވައިރަހެއްކަމަށް ޞިއްޚީ ބޭފުޅުން ވަނީ ވިދާޅުވެފައެވެ. އަދި ޚާއްސަކޮށް ރާއްޖެއަކީ މިވަގުތު ދުނިޔޭގެ އެންމެ ގިނަ ފަތުރުވެރިން ޗުއްޓީއަށް އަންނަ މަންޒިލަށްވާއިރު، މިވޭރިއަންޓު ރާއްޖެ ނާންނާކަމަށް ބަލައިގެން ނުވާނެކަމަށް ރޭ ބޭއްވި ނޫސްވެރިންގެ ބައްދަލުވުމުގައި ޑރ.ނަޒްލާ މުސްތަފާ ވަނީ ވިދާޅުވެފައެވެ. މިވައިރަސްއަށް ރާއްޖެއިން ޓެސްޓް ކުރެވޭނެ ގޮތެއް ނެތި، ވައިރަސް ދެނެގަނެވޭނެ ގޮތެއް ނެތުމާއިއެކު އޮން ނުރައްކާވެސް ވަނީ ބޮޑުވެފައެވެ.
ނަމަވެސް ޞިއްޚީ ބޭފުޅުން ދެއްވާ އިރުޝާދަކީ ކޯވިޑްގެ އާ ވޭރިއަންޓަކީވެސް މިހާރުވެސް ބަލިޖައްސާ ވައިރަސްގެ ވައްތަރެއް ކަމަށެވެ. އަދި އިންކޮންމެ ވައިރަސްއަކަށްވެސް މިވަގުތު ދެވެން އޮތް ފަރުވާއަކީ ފެށުނީއްސުރެ ކޯވިޑުން ރައްކާތެރިވުމަށް އަޅަމުންދާ ރައްކާތެރިކަމުގެ ފިޔަވަޅުތައްކަމަށް ނަޒްލާ ވަނީ ވިދާޅުވެފައެވެ. މާސްއެޅުމާއި، ގައިދުރުކަން އިސްކުރުމާއި، ޕާޓީތަކާއި، ހަފްލާތަކާއި، އެއްވުންތައް ނުބޭއްވުންފަދަ އިރުޝާދުތައް ޞިއްޚީ ބޭފުޅުން ދަނީ ދެއްވަމުންނެވެ.
ދިވެހިރާއްޖޭގައި ކޯވިޑް-19 ފެތުރުން ކޮންޓްރޯލްކޮށް، އާންމު ރައްޔިތުންގެ ޞިއްޙަތާއި ރައްކައުތެރި ކަމަށް ޓަކައި،
ޢާންމު ޞިއްޙަތު ރައްކާތެރިކުރުމުގެ ޤާނޫނުގެ ދަށުން އަޅަންޖެހޭ ޚާއްޞަ ފިޔަވަޅުތައް އެޅުމަށް މަގުފަހިކުރުމުގެ ގޮތުން، ބުނެވިދިޔަ އާންމު ޞިއްޙަތުގެ ކުއްލި ނުރައްކަލުގެ ހާލަތު ޢިއުލާންކޮށްފައިވަނީ، މިއަހަރުގެ މާޗް މަހުގެ 12 ވަނަ ދުވަހުން ފެށިގެންނެވެ. މިމުއްދަތު އެކި ފަހަރު މަތިން އިތުރުކޮށްފައިވާއިރު، އެންމެ ފަހުން ކުރި ޢިއުލާނުގައިވާގޮތުން ޢާއްމު ސިއްޙަތުގެ ކުއްލި ނުރައްކަލުގެ ޙާލަތު އަންނަ ޖެނުއަރީމަހުގެ 4 ވަނަ ދުވަހުގެ ނިޔަލަށް އޮންނާނެެވެ.
ޞިއްޚީ ކުއްލި ނުރައްކަލުގެ ހާލަތުގައި ޚާއްސަ ބާރުތަކެއް އެޗްޕީއޭއަށް ލިބިގެންވާއިރު، މި މުއްދަތަށް ނިމުމެއް އަންނާނެކަމަށް ދެކެމުންދިޔަ ދިއުމަށް އަނެއްކާވެސް މިވަނީ އިތުރު އިންތިޒާރެއް ކުރަންޖެހިފައެވެ. 2020 ނިމި 2021 އާއި ކުރިމަތިލާއިރުވެސް މުޅި ދުނިޔެ އޮތީ މި ނުރައްކާތެރި ފައްތަރުގައި ހާލަތުން އަރައިގަތުމަށް މާބޮޑު ކަމެއް ނުކުރެވިއެވެ.
