އެސްޓީއޯއިން އިއްޔެ ނެރުނު ބަޔާނެއްގައި ދިވެހި ބާޒާރުގައި މަކިޓާ ބްރޭންޑުގެ ފޭކް އުފެއްދުންތައް ގިނަވަމުންދާތީ އެކަމާމެދު ރައްޔިތުން ސަމާލުވުމަށް ގޮވާލައިފިއެވެ.
ބަޔާނުގައި ފާހަގަކޮށްފައިވާ ގޮތުގައި، ދިވެހިރާއްޖޭގައި މަކިޓާ ބްރޭންޑުގެ އެކްސްކްލޫސިވް ޑިސްޓްރިބިއުޓަރަކީ އެސްޓީއޯ ކަމަށާއި، ގިނަ އަހަރުތަކެއް ވަންދެން މި ބްރޭންޑުގެ އޮރިޖިނަލް އުފެއްދުންތައް ރާއްޖެއަށް އެތެރެކޮށް ވިއްކަމުން އަންނަ ކަމަށް ބުނެފައިވެއެވެ. އެހެންނަމަވެސް ފަހަކަށް އައިސް ރާއްޖޭގެ ބާޒާރުގައި މި ބްރޭންޑުގެ ނަކަލު އުފެއްދުންތައް ދައުރުވަމުންދާކަން ފާހަގަކުރެވިފައިވާ ކަމަށް އެސްޓީއޯއިން ބުނެއެވެ.
މި ނަކަލު އުފެއްދުންތަކަކީ އޭގެ ބޭނުން އެދެވޭ ގޮތުގައި ހިފޭނެކަމުގެ ޔަގީންކަމެއް ނެތް، އަދި ރައްކާތެރިކަމުގެ އެއްވެސް ގެރެންޓީއެއް ނެތް އުފެއްދުންތަކެއް ކަމަށް އެސްޓީއޯއިން ވަނީ އިންޒާރުދީފައެވެ. އެސްޓީއޯގެ އައުޓްލެޓްތަކުންނާއި ހުއްދަ ލިބިފައިވާ ފަރާތްތަކުން އެކަނި މި ބްރޭންޑުގެ އޮރިޖިނަލް އުފެއްދުންތައް ލިބެން ހުންނާނެކަމަށާއި، އާފްޓަރ ސޭލްސް ޚިދުމަތްވެސް ލިބޭނީ މި ފަރާތްތަކުން ގަންނަ އުފެއްދުންތަކަށް އެކަނި ކަމަށް ބަޔާނުގައި ބުނެފައިވެއެވެ.
އެސްޓީއޯއިން ވަނީ މަކިޓާ ބްރޭންޑުގެ އުފެއްދުންތަކުގެ އަސްލުކަން ޔަގީންކުރުމަށް އެހީތެރިކަން ބޭނުންވާ ފަރާތްތަކަށް އެސްޓީއޯގެ މަކިޓާ ޝޯރޫމަށް ވަޑައިގެން އެކަން ބެއްލެވުމަށް ދަޢުވަތު ދީފައެވެ.
