އައިޖީއެމްއެޗްގެ ނަރުހެއް ކަމުގައިވާ މޭރީ ގްރޭސްގެ މަރުގެ މައްސަލައިގައި ދައުވާލިބޭ ހަލީމަތު ލަމްހާ ބަންދުން ދޫކޮށްލުމަށް ކްރިމިނަލް ކޯޓުން ނެރުނު އަމުރާ ގުޅޭ މައްސަލަ އަލުން ބެލުމަށް ހައިކޯޓުން މިއަދު މެންދުރުފަހަށް ތާވަލް ކޮށްފިއެވެ.
މި މައްސަލައިގެ ތަފްސީލަށް ބަލާއިރު، 2021 ވަނަ އަހަރުގެ އޮކްޓޫބަރު މަހު ފިލިޕީންސްގެ ނަރުހެއް ކަމަށްވާ މޭރީ ގްރޭސް މަރާލި ކަމުގެ ދައުވާ އޭނާގެ ފިރިމީހާ މާވިން އެސްވައިގެ މައްޗަށް ދައުލަތުން ކުރިއެވެ. އަދި މި މައްސަލައިގައި ބައިވެރިވި ކަމުގެ ދައުވާ ލަމްހާގެ މައްޗަށް ކުރެވުނެވެ. މިދިޔަ އަހަރުގެ ނޮވެންބަރު މަހު ކްރިމިނަލް ކޯޓުން ވަނީ ލަމްހާ ޝަރުތުތަކަކާއެކު ދޫކޮށްލާފައެވެ.
ދައުލަތުން މި މައްސަލަ ހައިކޯޓުގައި އިސްތިއުނާފު ކުރުމުން، އެ ކޯޓުގެ ރަޖިސްޓްރާ އަދި ފަނޑިޔާރުންގެ މަޖިލީހުން ވަނީ މައްސަލަ ބަލައިނުގަތުމަށް ނިންމާފައެވެ. އެހެންނަމަވެސް، ދައުލަތުން މި މައްސަލަ ސުޕްރީމް ކޯޓަށް ހުށަހެޅުމުން، އެ ކޯޓުން ވަނީ ހައިކޯޓުގެ ނިންމުން ރަނގަޅު ނޫން ކަމަށް ކަނޑައަޅައި، 10 ދުވަހުގެ ތެރޭގައި މައްސަލަ އަލުން ހުށަހެޅުމަށް ފުރުސަތު ދީފައެވެ.
ފާހަގަކޮށްލެވޭ ކަމަކީ، 2023 ވަނަ އަހަރުވެސް ކްރިމިނަލް ކޯޓުން ލަމްހާ ދޫކޮށްލުމުން، ހައިކޯޓުން ވަނީ އޭނާ އަލުން ބަންދުކުރުމަށް އަމުރުކޮށްފައެވެ. އަދި މިހާރު ލަމްހާގެ މައްސަލަ އަލުން ބެލުމަށް ސުޕްރީމް ކޯޓުން އަންގާފައިވާއިރު، މި މައްސަލައިގެ މައިގަނޑު ދައުވާލިބޭ ފަރާތް ކަމަށްވާ މާވިން އަދިވެސް ވަނީ ބަންދުގައެވެ.
