ކްރިމިނަލް ކޯޓުން މުހައްމަދު ހުމައިދުގެ މައްޗަށް ކުށް ސާބިތުނުވާކަމަށް ނިންމި ނިންމުން ހައިކޯޓުގައި އިސްތިއުނާފް ނުކުރުމާ ގުޅިގެން، ހައިކޯޓުގެ ފަނޑިޔާރުން ދައުލަތުގެ މައްޗަށް ވަރަށް ގިނަ ސުވާލުތަކެއް އުފައްދަވައި، ނުރުހުން ފާޅުކުރައްވައިފިއެވެ.
2015 ވަނަ އަހަރުގެ ފެބްރުއަރީ މަހު ދަރުބާރުގެ ކައިރީގައި ޖައިލަމް އަހްމަދު ޝާކިރަށް ތޫނު އެއްޗަކުން ހަމަލާދީ މަރާލި މައްސަލައިގައި ދައުލަތުން ވަނީ ހަތަރު މީހެއްގެ މައްޗަށް ދަޢުވާ އުފުލާފައެވެ. އެއީ ނަސީބު ސައީދު، އިސްމާއިލް އަނީގް، އަލީ އިރުފާން އަދި މުހައްމަދު ހުމައިދެވެ. މިއިން ހުމައިދުގެ މައްޗަށް އުފުލާފައިވަނީ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ދަޢުވާ ކަމަށްވާއިރު، އަނެއް ތިން މީހުންގެ މައްޗަށް އުފުލާފައިވަނީ މީހަކު މަރާލުމުގައި ބައިވެރިވުމުގެ ދަޢުވާއެވެ.
2022 ވަނަ އަހަރުގެ މާރިޗު 10 ވަނަ ދުވަހު ކްރިމިނަލް ކޯޓުން ވަނީ ހެކި ނެތުމުގެ ސަބަބުން މި ހަތަރު މީހުންގެ މައްޗަށްވެސް ކުށް ސާބިތުނުވާ ކަމަށް ކަނޑައަޅާފައެވެ. ނަމަވެސް ދައުލަތުން ހައިކޯޓުގައި އިސްތިއުނާފް ކޮށްފައިވަނީ ހަމައެކަނި ނަސީބު، އަނީގް އަދި އިރުފާނުގެ މައްސަލައެވެ. ހުމައިދުގެ މައްސަލަ އިސްތިއުނާފް ނުކުރުމުން، މިއަދު ހައިކޯޓުގައި މައްސަލައިގެ އަޑުއެހުން ފެށުމާއެކު، ފަނޑިޔާރުން ވަނީ ދައުލަތާ ދެކޮޅަށް ސުވާލުތަކެއް އުފައްދަވާފައެވެ.
ދައުލަތުން ބުނެފައިވާ ގޮތުގައި، ހުމައިދުގެ މައްސަލަ އިސްތިއުނާފް ނުކުރެވުނީ އޭނާއާ ދެކޮޅަށް އެއްވެސް ހެކިބަހެއް ލިބިފައިނުވާތީއެވެ. އޭނާ ވަނީ ހާދިސާ ހިނގުމާއެކު ރާއްޖެއިން ފިލައިގެން ގޮސް، އަނެއް ތިން މީހުންގެ މައްސަލަ ކޯޓުގައި ކުރިއަށްދަނިކޮށް އެނބުރި އައިސްފައެވެ. އަދި އޭނާގެ މައްޗަށް ދަޢުވާ އުފުލިއިރު، އަނެއް ތިން މީހުންގެ މައްސަލައިގައި މުހިންމު ސިއްރު ހެކިވެރިއެއްގެ ހެކިބަސް ވަނީ ނަގައި ނިމިފައެވެ.
ފަނޑިޔާރު ހުސެއިން މަޒީދު ވަނީ މީހަކު މަރާލުމަށްފަހު ފިލައިގެން ގޮސް، ދުވަސްކޮޅަކު ފަހުން އެނބުރި އައުމުން އެމީހަކަށް ދަޢުވާ ނުކުރެވޭކަމަށްވާނަމަ، މިއީ ޖިނާއީ އަދުލުގެ ނިޒާމުގައި އޮތް ވަރަށް ބޮޑު އައިބެއްކަމަށް ފާހަގަކުރައްވާފައެވެ. ދައުލަތުން ބުނެފައިވަނީ ހުމައިދުގެ މައްޗަށް ދަޢުވާ ނުކޮށް ލަސްވީ، އޭނާ ފިލައިގެން ދިޔައިރު ތަޙްޤީޤަށް ބަޔާނެއްވެސް ދީފައިނުވާތީ، ތުހުމަތުކުރެވޭ މީހާގެ ބަޔާނެއް ނެތި ތަޙްޤީޤު ފުރިހަމަނުވާނެތީ ކަމަށާއި، މީހާގެ ޣައިރު ހާޒިރުގައި ޝަރީޢަތް ކުރިއަށް ނުގެންދެވޭނެކަމަށެވެ.
މިއަދުގެ އަޑުއެހުމުގައި ނަސީބް އަދި އަނީގަށް ވަކީލަކު ޢައްޔަނުކުރުމަށް ދެ ހަފްތާގެ މުއްދަތެއް ދެވިފައިވެއެވެ. މި މައްސަލަ ބައްލަވަނީ ފަނޑިޔާރު ހުސެއިން މަޒީދު، ފަނޑިޔާރު ދީބާނާޒް ފަހުމީ އަދި ފަނޑިޔާރު ހަސަން ޝަފީޢުއެވެ.
