މަސްވެރިކަމުގެ ދާއިރާގެ ތަރައްގީއަށް ދިރާސާއެއް ކުރުމަށް ކޮންސަލްޓަންސީ ފަރމެއް ހޯދުމަށް މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްއިން އިއުލާނުކޮށްފިއެވެ. މި ފަރމް ހޯދުމުގެ މައިގަނޑު މަޤްސަދަކީ އެކުއަކަލްޗަރ ސްޕީޝީޒްގެ އިޤްތިޞާދީ ފީޒިބިލިޓީ ދިރާސާއަކާއި މާކެޓް އެނަލިސިސްއެއް ހެދުމެވެ.
މި މަސައްކަތަށް ޝައުޤުވެރިވާ ފަރާތްތަކަށް އެކްސްޕްރެޝަން އޮފް އިންޓަރެސްޓް (އީއޯއައި) ހުށަހެޅުމުގެ ފުރުސަތު އަންނަ މަހުގެ 9 ވަނަ ދުވަހުގެ މެންދުރުފަހު 2:00 އާ ހަމައަށް ހުޅުވާލާފައިވެއެވެ.
މި އިއުލާނާ ގުޅިގެން ފާހަގަކޮށްލެވޭ ކަމަކީ، ސަރުކާރުން ވަނީ މަސްވެރިކަމާއި ކަނޑުގެ ވަސީލަތްތަކާ ގުޅޭ 25 އަހަރުގެ މާސްޓަރ ޕްލޭނެއް އެކުލަވާލުމަށް ނިންމާފައިވުމެވެ. ފިޝަރީޒް މިނިސްޓްރީން ކުރިން ހާމަކުރިގޮތުގައި، ރާއްޖޭގެ ތަރައްގީގެ މަޝްރޫޢުތައް ރޭވިފައިވާ ޕްލޭނެއްގެ ދަށުން ކުރިއަށް ގެންދިއުމަށްޓަކައި، ގާނޫނީ ބާރު ލިބިފައިވާ 20 އަހަރުގެ ގައުމީ ތަރައްގީގެ ޕްލޭނެއް އެކުލަވާލުމަކީ ރައީސް ޑރ. މުހައްމަދު މުއިއްޒުގެ ވަޢުދުފުޅެކެވެ.
