މިފްކޯއިން މިއަދު ހާމަކުރި ގޮތުގައި ގއ. ކޫއްޑޫ އައިސްޕްލާންޓުގެ ޖެނެރޭޓަރަަށް ދިމާވި ކަރަންޓުގެ މައްސަލަ މިހާރު ދެނެގަނެވިއްޖެއެވެ. އިއްޔެ ކޫއްޑޫ އައިސްޕްލާންޓަށް ދިމާވި ކަރަންޓުގެ މައްސަލައާ ގުޅިގެން އައިސް އުފެއްދުން ވަނީ މެދުކެނޑި، މަސްވެރިންނަށް އައިސް ލިބުމުގައި ދަތިތަކާ ކުރިމަތިލާން ޖެހިފައެވެ.

މި މައްސަލަ 24 ގަޑިއިރުގެ ތެރޭގައި ހައްލުކުރުމަށް މަސައްކަތްކުރަމުންދާ ކަމަށް މިފްކޯއިން އިއްޔެ ބުނެފައިވާއިރު، މިއަދު އިތުރަށް ހާމަކުރި ގޮތުގައި މިހާރު ވަނީ މައްސަލަ ދެނެގަތުމުގެ މަރުހަލާ ނިމި، ދިމާވެފައިވާ ޗެލެންޖަށް ހައްލު ހޯދުމުގެ މަސައްކަތް ކުރިއަށްދަނީއެވެ. އެގޮތުން ކަރަންޓުގެ މައްސަލަ ހައްލުކުރުމަށް އިތުރު އިންޖިނިއަރުން ކޫއްޑޫގެ އިންޖިނިއަރުންގެ ޓީމާ ގުޅޭނެ ކަމަށްވެސް މިފްކޯއިން ބުނެފައިވެއެވެ.

އަދި މި މައްސަލަ ދިމާވިނަމަވެސް އައިސް ޕްލާންޓުގެ އެހެނިހެން ފަންގްޝަންތައް ރަނގަޅު ކަމަށް މިފްކޯއިން ފާހަގަކޮށްފައިވެއެވެ. މީގެއިތުރުން، ގދ. ގައްދޫ އަދި ތިނަދޫގެ އައިސް ޕްލާންޓްތަކުގައި ދިމާވެފައިވާ މައްސަލަތައް ހައްލުކުރުމަށްޓަކައި އިންޖިނިއަރުން އެ ސަރަހައްދަށް ވަނީ ފޮނުވާފައެވެ. މި ހުރިހާ މައްސަލަތަކާ ގުޅިގެން މަސްވެރިން ވަނީ އެމީހުންގެ ކަންބޮޑުވުން ފާޅުކޮށްފައެވެ.