މަސްވެރިންނަށް މިހާތަނަށް ދޭންޖެހިފައިވާ ހުރިހާ ފައިސާއެއް މިފްކޯއިން މަސްވެރިންނަށް ދީ ނިންމާލައިފިއެވެ. މި މަހުގެ 16 ވަނަ ދުވަހު މިފްކޯއަށް މަސް ކިރުވި 56 ދޯންޏަކަށް ދޭންޖެހޭ 2.3 މިލިއަން ރުފިޔާ މިއަދު އެ ދޯނިތަކުގެ ބޭންކް އެކައުންޓްތަކަށް ޖަމާކޮށްފައިވާ ކަމަށް މިފްކޯއިން މައުލޫމާތު ދީފައިވެއެވެ.
މިފްކޯގެ މައުލޫމާތުތަކުން ދައްކާގޮތުގައި، 2023 ވަނަ އަހަރުގެ ނޮވެމްބަރު 20 އިން ފެށިގެން މިއަދާ ހަމައަށް، މި ސަރުކާރުން މަސްވެރިންނަށް ދޫކޮށްފައިވާ ފައިސާގެ އަދަދު އެއް ބިލިއަން ރުފިޔާއަށް ވުރެ މަތިވެފައިވެއެވެ. މިއީ 61،091 މެޓްރިކްޓަނުގެ މަހަށް ދޫކޮށްފައިވާ ފައިސާއެވެ.
ރައީސް ޑރ. މުއިއްޒުގެ ވައުދާ އެއްގޮތަށް، ބީއެމްއެލް އަދި އެމްއައިބީގައި އެކައުންޓް އޮންނަ މަސްދޯނިތަކަށް 48 ގަޑިއިރު ތެރޭގައި ފައިސާ ދޫކުރުމުގެ މަސައްކަތް ސަރުކާރުން ވަނީ ފަށާފައެވެ. ނަމަވެސް ރިޔާސީ އިންތިހާބުގެ ތެރޭގައި ރައީސް މުޢިއްޒު ވަޢުދުވެވަޑައިގެންނެވި ގޮތަށް މަހުގެ އަގު ކިލޯއަކަށް 20 ރުފިޔާއަށް ބަދަލުކުރުމުގެ ބަދަލުގައި، މިހާރު ވަނީ 16 ރުފިޔާއަށް ހަމަޖައްސާފައެވެ.
