ޢައްޒާގައި އިސްރާއީލުން ހިންގަމުންދާ އުދުވާން ހުއްޓާލުމަށް އެގައުމުން އެއްބަސް ވެއްޖެ ކަމުގެ ޚަބަރު ޢައްޒާގައި ފެތުރުމާއެކު، އެ ސިޓީގައި އައްޒާގެ ރައްޔިތުން އުފާ ފާޅުކުރަން ފަށައިިފިއެވެ.
އިޒްރޭލް ސަރުކާރާއި ހަމާސްއިން ޣައްޒާގައި ހިނގަމުންދާ ހަނގުރާމަ ވަގުތީގޮތުން ހުއްޓާލުމަށާއި މަރުހަލާތަކެއްގެ ދަށުން ރަހީނުންނާއި ފަލަސްޠީނު ގައިދީން ދޫކޮށްލުމަށް އެއްބަސްވެފައިވާކަމަށް މަޝްވަރާތަކާ ގުޅޭ މަޢުލޫމާތު ލިބިފައިވާ ފަރާތަކުން ސީއެންއެންއަށް މަޢުލޫމާތު ދީފައިވެއެވެ.
އަދި ރަސްމީކޮށް އިޢުލާނު ނުކުރާ މި އެއްބަސްވުމުގެ ދަށުން، ހަމާސްއާއި އެ ޖަމާޢަތާ ގުޅިފައިވާ ހަނގުރާމަވެރި ޖަމާޢަތްތަކުން 2023 ވަނަ އަހަރުގެ އޮކްޓޯބަރު 7 ގައި އިޒްރޭލުން ރަހީނުންގެ ގޮތުގައި ހިފައިގެން ގެންގޮސްފައިވާ 33 މީހުން ދޫކޮށްލުމަށް ހަމަޖެހިފައިވެއެވެ.
މީގެ ބަދަލުގައި އިޒްރޭލުން ފަލަސްޠީނު އެތައް ސަތޭކަ ގައިދީން ދޫކޮށްލާނެއެވެ.
މި އެއްބަސްވުމުގެ ސަބަބުން އެއް އަހަރަށްވުރެ ގިނަ ދުވަހުގެ ފަހުން، އަދި އިޒްރޭލުން ހަމަލާތައް ދޭން ފެށި ފަހުން ދެވަނަ ފަހަރަށް ޣައްޒާގެ ރައްޔިތުންނަށް ހަނގުރާމައިން ލުޔެއް ލިބިގެންދާނެއެވެ.
އެއްބަސްވުން ކަށަވަރުވުމުން، ފަލަސްޠީނު ރައްޔިތުންނަށް އުތުރު ޣައްޒާއަށް އެނބުރި ދިއުމުގެ ހުއްދަ ލިބި، ދިގު މުއްދަތެއް ވަންދެން ނުރައްކާތެރި އިންސާނީ ޙާލަތެއްގައި ދިރިއުޅެމުންދާ ޣައްޒާގެ ރައްޔިތުންނަށް ބޮޑު އަދަދެއްގެ އިންސާނީ އެހީ ފޯރުކޮށްދެވޭނެކަމަށް ބެލެވެއެވެ.
އެމެރިކާގެ ރައީސްކަމަށް އިންތިޚާބުވެފައިވާ ޑޮނަލްޑް ޓްރަމްޕް ވިދާޅުވެފައިވަނީ "ޣައްޒާގައި ތިބި ރަހީނުންނާ ގުޅޭ ގޮތުން އެއްބަސްވުމަކަށް އާދެވިއްޖެ" އަދި "މުސްތަޤުބަލެއްގައި އެމީހުން ދޫކޮށްލާނެ" ކަމުގައެވެ. މިފަދަ އެއްބަސްވުމަކަށް އާދެވިފައިވާކަން ރަސްމީކޮށް އަދި އެއްވެސް ފަރާތަކުން ކަށަވަރުކޮށްދީފައެއް ނުވެއެވެ.
އިޒްރޭލްގެ ސިފައިން ޣައްޒާއަށް ދެމުންދާ ހަމަލާތައް އިތުރުކޮށް، މަދަރުސާއަކަށް ބަދަލުކޮށްފައިވާ ހިޔާވަހިކަމުގެ މަރުކަޒަކަށާއި ގިނަ ގޭގެއަކަށް ބޮންއަޅާ، ފާއިތުވި 24 ގަޑިއިރުގެ ތެރޭގައިވެސް މަދުވެގެން 62 މީހުން ޝަހީދު ކޮށްލާފައި ވެއެވެ.
އިސްރާޭލުގެ ޓެލް އަވީވްގައި އެތައް ހާސް ބަޔަކު މުޒާހަރާކޮށް، ޣައްޒާގައި ބަންދުކޮށްފައި ތިބި މީހުން ދޫކޮށްލުމަށް އެދި ގޮވާލާފައިވާއިރު، ހަރުކަށި ފިކުރުގެ އެތައް ސަތޭކަ މީހުން ޖެރޫސަލަމްގައި ހިނގާލައި، ހަނގުރާމަ ކުރިއަށް ގެންދިއުމަށްވެސް ވަނީ ގޮވާލައިފިއެވެ.
އިޒްރޭލުން ޣައްޒާއަށް ދެމުންދާ ހަމަލާތަކުގައި 2023 ވަނަ އަހަރުގެ އޮކްޓޯބަރ 7 އިން ފެށިގެން މަދުވެގެން 46,707 ފަލަސްޠީނުން ޝަހީދުވެ، 110,265 މީހުންނަށް ޒަޚަމްވެފައިވެއެވެ. އަދި އެދުވަހު ހަމާސްއިން އިސްރޭލުގައި ދިން ހަމަލާތަކުގައި އިޒްރޭލްގެ މަދުވެގެން 1,139 މީހުން މަރުވި އިރު، 200 އަށްވުރެ ގިނަ މީހުން ރަހީނުންގެ ގޮތުގައި ހިފެހެއްޓިއެވެ.
