އެކި އެކި މައްސަލަތަކުގައި 122 ފަހަރު ހައްޔަރުކޮށްފައިވާ މީހަކު އަލުން ހައްޔަރުކޮށްފިއެވެ. މިފަހަރު ތ. ތިމަރަފުށީ ލަކީހައުސް ސަފްވާން އަލީ ހައްޔަރުކޮށްފައިވަނީ ޓްރިމަރަކާއި ފަސް ފޮށި ގަލަން ވަގަށް ނެގުމުގެ ތުހުމަތުގައެވެ.
މީގެ ކުރިން ވެސް އެކި މައްސަލަތަކުގައި ގިނަ ފަހަރު މަތިން ހައްޔަރުކޮށްފައިވާ ސަފްވާން، މިދިޔަ އަހަރުގެ ފަހުކޮޅު ރަސްފަންނު ބީޗުން ދަބަހެއް ވަގަށް ނެގުމުގެ މައްސަލައިގައިވެސް ހައްޔަރުކޮށްފައިވެއެވެ. މިފަހަރުގެ މައްސަލައިގައި ކޯޓަށް ހާޒިރުކުރުމުން، ސަފްވާންގެ ބަންދުގެ މުއްދަތުގެ ގޮތުގައި ފަސް ދުވަސް ކަނޑައަޅާފައިވެއެވެ. އޭނާގެ ބަންދު އަމުރު ރިޕޯޓުގައި ގާޒީ ފާހަގަކުރައްވާފައިވާ ގޮތުގައި، މިހާތަނަށް އެކި މައްސަލަތަކުގައި އޭނާ ވަނީ 122 ފަހަރު ހައްޔަރުކޮށްފައެވެ.
