އީރާނާ ގުޅުން އޮންނަ ފަރާތްތަކަކުން ހޮރްމުޒް ކަނޑުއޮޅިން މިއަދު ދަތުރުކުރަމުންދިޔަ ވިޔަފާރި ތިން އުޅަނދަކަށް ހަމަލާދީފިކަމަށް ކަނޑުމަތީގެ ސަލާމަތީ އިދާރާތަކުން ހާމަކޮށްފިއެވެ.
މި ހަމަލާތަކުގެ ތެރެއިން ފުރަތަމަ ހަމަލާ އަމާޒުވީ އޮމާންގެ އުތުރުން 11 ނޯޓިކަލް މޭލު ބޭރުން ދަތުރުކުރަމުންދިޔަ ތައިލެންޑްގެ މުދާ އުފުލާ ބޯޓެއް ކަމަށްވާ "މަޔޫރީ ނާރީ" އަށެވެ. ހަމަލާގެ ސަބަބުން ބޯޓުގައި އަލިފާން ރޯވުމާއެކު ގިނަ ފަޅުވެރިން ވަނީ ބޯޓުން ބާލާފައެވެ. އިނގިރޭސިވިލާތުގެ މެރިޓައިމް ޓްރޭޑް އޮޕަރޭޝަންސް އިން މައުލޫމާތު ދޭގޮތުގައި، މިހާރު އަލިފާން ނިއްވާލާފައިވާއިރު ތިމާވެއްޓަށް އެއްވެސް ގެއްލުމެއް ލިބިފައެއް ނުވެއެވެ. އަދި ބޯޓު ބެލެހެއްޓުމަށް ބޭނުންވާ މިންވަރަށް ފަޅުވެރިން މިހާރުވެސް ބޯޓުގައި އެބަތިއްބެވެ.
މީގެ އިތުރުން ޔޫއޭއީގެ ރައުސް އަލް-ހައިމާގެ ބޭރުން ޖަޕާނުގެ ކޮންޓެއިނާ ބޯޓު "ވަން މެޖެސްޓީ" އަށާއި، ދުބާއީގެ ބޭރުން މާޝަލް އައިލެންޑްސްގެ ބޯޓު "ސްޓާ ގްވިނެތު" އަށް ވެސް ވަނީ ހަމަލާދީފައެވެ. މި ދެ ބޯޓަށް ކުދި ގެއްލުންތަކެއް ލިބުނު ނަމަވެސް، ހުރިހާ ފަޅުވެރިންގެ ހާލުވެސް ރަނގަޅުކަމަށާއި، ބޯޓުތައް މިހާރު ދަނީ ރައްކާތެރި ބަނދަރުތަކަށް މިސްރާބު ޖަހާފައިކަމަށް ކަމާބެހޭ ފަރާތްތަކުން ކަށަވަރުކޮށްދެއެވެ.
ދުނިޔޭގެ ތެލާއި ގޭހުގެ 20 އިންސައްތަ ސަޕްލައި ދަތުރުކުރާ މި މުހިންމު ކަނޑުއޮޅީގައި ދަތުރުފަތުރު ވަރަށް ބޮޑަށް މަދުވެފައިވަނީ މިދިޔަ މަހުގެ 28 ގައި އީރާނުގައި ފެށުނު ހަމަނުޖެހުންތަކާ ގުޅިގެންނެވެ. މިއަދުގެ ހަމަލާތަކާއެކު، އެ ސަރަހައްދުން ހަމަލާ އަމާޒުވި އުޅަނދުތަކުގެ އަދަދު 14 އަށް އަރާފައިވާއިރު، މިއީ ދުނިޔޭގެ ހަކަތަ ފޯރުކޮށްދޭ މައި މަގުތަކުގެ ރައްކާތެރިކަމާމެދު އޮތް ވަރަށް ބޮޑު ކަންބޮޑުވުމެކެވެ.
ކޮމެންޓު ފޮނުވާ