މިފްކޯއިން މިއަދު ހާމަކުރި މަޢުލޫމާތުގައިވާ ގޮތުން، ކޫއްޑޫގައި ދިމާވެފައިވާ ކްރޭނުގެ މައްސަލަ މިއަދު ހައްލުކޮށް، އޮޕަރޭޝަނަށް ގެނެވޭނެއެވެ.
އެ ކުންފުނިން ބުނާ ގޮތުގައި ކޫއްޑޫގައި މިވަގުތު ބެހެއްޓިފައިވާ 3 ކްރޭނުގެ ތެރެއިން ކްރޭން 1 އަދި 3 ވަނީ ފުރިހަމައަށް މަސައްކަތްކުރާ ހާލަތުގައެވެ. ނަމަވެސް ކްރޭން 2 އަށް ދިމާވެފައިވާ މައްސަލަ ހައްލުކުރުމަށް މިފްކޯގެ އިންޖިނިއަރިންގ ޓީމުން ވަނީ ގަދައަޅައި މަސައްކަތްކުރަމުންނެވެ. މީގެ އިތުރުން، އެ ކްރޭނުގެ މަރާމާތަށް ބޭނުންވާ ސާމާނު ހޯދުމުގެ މަސައްކަތް ވެސް ދަނީ ކުރެވެމުންނެވެ. މިފްކޯއިން އިތުރަށް ހާމަކުރި ގޮތުގައި، މިހާރު ވަނީ ބޭނުންވާ ސާމާނު ހޯދައި، މިއަދު އެ ކްރޭން އޮޕަރޭޝަނަށް ގެނެވޭނެ މަގު ތަނަވަސްވެފައެވެ. މި ދުވަސްވަރު ރާއްޖޭގެ މަސްވެރިކަން ރަނގަޅުވެފައިވުމާ ގުޅިގެން، މިފްކޯގެ މަސް ގަންނަ މަރުކަޒުތަކަށް ކިރާ މަހުގެ އަދަދު ވަނީ އިތުރުވެފައިކަން ފާހަގަކުރެވެއެވެ.
