ޖެހިޖެހިގެން 6 ވަނަ އަހަރަށް ދެކުނު އޭޝިއާގެ އެންމެ ބާރުގަދަ ޕާސްޕޯޓުގެ މަޤާމު ދިވެހިރާއްޖެއަށް ލިބިއްޖެއެވެ. އިނގިރޭސިވިލާތުގެ ހެންލީ އެންޑް ޕާޓްނަރސްއިން އާއްމުކުރާ "ހެންލީ ޕާސްޕޯޓް އިންޑެކްސް" ގައި ދިވެހިރާއްޖެ މިހާރު ވަނީ ދުނިޔޭގެ 53 ވަނަ ގޮތުގައި ރޭންކް ކުރެވިފައެވެ. މިއީ މިދިޔަ އަހަރުގެ 57 ވަނަ ރޭންކިންގ އިން ކުރިއަށް ޖެހިލުމެކެވެ.
މި އިންޑެކްސް އެކުލަވާލުމުގައި ބަލަނީ އެ ޤައުމެއްގެ ޕާސްޕޯޓް ބޭނުންކޮށްގެން ވިސާއާ ނުލައި ދަތުރުކުރެވޭ ޤައުމުތަކުގެ އަދަދަށެވެ. އިންޓަރނޭޝަނަލް އެއަރ ޓްރާންސްޕޯޓް އެސޯސިއޭޝަން (އައިއޭޓީއޭ) ގެ މަޢުލޫމާތުތަކަށް ބިނާކޮށް ހެންލީ އެންޑް ޕާޓްނަރސްއިން މި އިންޑެކްސް މަހުން މަހަށް އަޕްޑޭޓް ކުރަމުން ގެންދެއެވެ.
ދިވެހި ޕާސްޕޯޓް ބޭނުންކޮށްގެން މިހާރު ދުނިޔޭގެ 94 ޤައުމަކަށް ވިސާއަކާ ނުލައި ދަތުރުކުރެވެއެވެ. ދެކުނު އޭޝިއާގެ ސަރަޙައްދުގައި ދިވެހިރާއްޖެއާ އެންމެ ގާތުން ވާދަކުރާ އިންޑިއާގެ ޕާސްޕޯޓުން 57 ޤައުމަކަށް ވިސާއަކާ ނުލައި ދަތުރުކުރެވޭއިރު، އެ ޤައުމު އޮތީ ދުނިޔޭގެ 85 ވަނަ ގޮތުގައެވެ. އަދި ސްރީ ލަންކާ އޮތީ 96 ވަނަ ގޮތުގައެވެ.
ހެންލީ އެންޑް ޕާޓްނަރސްއިން ބަލަހައްޓަމުންދާ 199 ޕާސްޕޯޓުގެ ތެރެއިން، އެންމެ ބާރުގަދަ ޕާސްޕޯޓުގެ މަޤާމުގައި ވަނީ ސިންގަޕޫރެވެ. ސިންގަޕޫރު ޕާސްޕޯޓް ބޭނުންކޮށްގެން 195 ޤައުމަކަށް ވިސާއަކާ ނުލައި ދަތުރުކުރެވެއެވެ.
