މާލެއަށް ރޭ މެންދަމުން ފެށިގެން ވެހުނު ވާރޭގައި މާލޭގެ ގިނަ ސަރަހައްދުތަކެއްގައި ފެންބޮޑުވުމާ ގުޅިގެން، ސިފައިން އަދިވެސް ދަނީ ފެން ހިންދުމުގެ މަސައްކަތް ކުރަމުންނެވެ. އެމްއެންޑީއެފް ފަޔަރ އެންޑް ރެސްކިޔު ސަރވިސްއިން މާލޭގެ 7 ސަރަހައްދެއްގައި 17 ޕަންޕު ބަހައްޓައިގެން މިހާތަނަށް 18201 ޓަނުގެ ފެން ހިންދާފައިވާކަމަށް ސިފައިންގެ އެންމެ ފަހުގެ މައުލޫމާތުން ދައްކައެވެ.
މިގޮތުން ވެސްޓްޕާކް، އައިޖީއެމްއެޗް ސަރަހައްދު، ވިލިމާލެ ފެރީ ޓާމިނަލް، ސަލްމާން މިސްކިތް ސަރަހައްދު، ބޮޑު ވަޅު، ދަރުބާރުގެ ސަރަހައްދު، ހަވީރީހިނގުން އަދި އެމްޕީއެލް ކައިރީގައި ފެން ހިންދުމުގެ މަސައްކަތް ކުރިއަށްދާކަމަށް އެމްއެންޑީއެފުން މައުލޫމާތު ދީފައިވެއެވެ. އަދި އެމްއެންޑީއެފް މާލޭ އޭރިއާ ކޮމާންޑުން ކުރިއަށްގެންދާ އޮޕަރޭޝަންގައި މިހާތަނަށް 104 ގެއަކަށް އެހީތެރިކަން ފޯރުކޮށްދީ، 528 ވެލި ބަސްތާ ޖަހާދީފައިވާ ކަމަށްވެސް ސިފައިން ބުނެއެވެ.
މިހާރު ރާއްޖެއަށް ކުރަމުންދާ ވިއްސާރައިގައި މާލެއަށް ލިބެމުންދާ ގެއްލުންތަކުން ރައްޔިތުން ސަލާމަތްކުރުމަށް، ސިފައިންނާއި ފުލުހުންގެ އިތުރުން އެންޑީއެމްއޭ އަދި މާލެ ސިޓީ ކައުންސިލުން ވެސް ދަނީ ހަރަކާތްތެރިވަމުންނެވެ. އަދި މާލޭގެ އެކި ސަރަހައްދުތަކުގައި ވެލި ބަސްތާތައް ޖެހުމުގެ މަސައްކަތްވެސް ކަމާބެހޭ ފަރާތްތަކުން ކުރިއަށް ގެންދެއެވެ.
