ކުޑަކުދިން ގްރޫމް ކުރި ކަމުގެ ތުހުމަތުގައިވާ ޓީޗަރެއް އަލުން ބަންދު ކުރުމަށް ހައިކޯޓުން އަމުރު ކޮށްފިއެވެ.
މި މައްސަލައިގެ ތަފްސީލަށް ބަލާއިރު، ކުޑަކުދިންނާ އެކު އުމުރާ ނުގުޅޭ ވާހަކަތަކެއް ދެއްކުމުގެ ތުހުމަތުގައިވާ 29 އަހަރުގެ ދިވެހި ޓީޗަރެއްގެ މައްސަލަ ފުލުހުންނަށް ހުށަހެޅުނީ މިދިޔަ އޮކްޓޯބަރު 17 ވަނަ ދުވަހުއެވެ. މި މައްސަލަ ހުށަހެޅުނީ ރާއްޖޭގެ ދެކުނު މެދު ސަރަހައްދުގެ އަތޮޅެއްގެ ރަށަކުންނެވެ.
ފުލުހުން މައުލޫމާތު ދިން ގޮތުގައި، މި މައްސަލައިގައި ޓީޗަރު ހައްޔަރުކުރެވުނީ ކޯޓު އަމުރެއްގެ ދަށުން، މައްސަލا ހުށަހެޅުނުތާ 10 ދުވަސް ފަހުން، އޮކްޓޯބަރު 27 ގައެވެ. އޭނާގެ ފުރަތަމަ ބަންދުގެ މުއްދަތަކީ 20 ދުވަހެވެ. އޭގެ ފަހުން 30 ދުވަހުގެ މުއްދަތެއް އިތުރުކުރެވުނު ނަމަވެސް، މެޖިސްޓްރޭޓް ކޯޓުން ވަނީ ވަކި ޝަރުތުތަކަކާއެކު އޭނާ ދޫކޮށްލުމަށް ނިންމާފައެވެ.
ނަމަވެސް މެޖިސްޓްރޭޓް ކޯޓުގެ މި ނިންމުން ދައުލަތުން ހައިކޯޓުގައި އިސްތިއުނާފު ކުރުމުން، ހައިކޯޓުން ވަނީ ކުޑަކުދިންނަށް ޖިންސީ ގޯނާކުރާ މީހުންނަކީ މުޖުތަމައުގެ ސަލާމަތަށް ނުރައްކަލެއްކަމަށް ފާހަގަކޮށްފައެވެ. އަދި ކުރިން މިފަދަ ތުހުމަތެއް ނެތް ނަމަވެސް، އެހެން ކުޑަކުދިން ރައްކާތެރިކުރުމަށްޓަކައި، އަދި ފުލުހުން ހުށަހެޅި ލިޔެކިޔުންތަކަށް ބަލާއިރު ތުހުމަތުކުރެވޭ ޓީޗަރުގެ ދިރިއުޅުމުގެ ވައްޓަފާޅި ހުރީ ކުޑަކުދިންނަށް ރައްކާތެރި ގޮތަކަށް ނޫންކަމަށް ބުރަވެވޭތީ، ތިން ފަނޑިޔާރުންގެ އިއްތިފާގުން ވަނީ މެޖިސްޓްރޭޓް ކޯޓުގެ ނިންމުން ބަދަލުކޮށް، އިތުރު ގޮތެއް ނިންމަންދެން 7 ދުވަހުގެ މުއްދަތަށް އޭނާ ބަންދުގައި ބެހެއްޓުމަށް އަމުރުކޮށްފައެވެ.
