ސުޕްރީމް ކޯޓުގައި އިސްތިއުނާފަށް ހުށަހަޅާފައިވާ، ސިޔާސީ މަގާމެއްގައި ހުރެ ދައުލަތާ ދެކޮޅަށް ވަކާލާތު ނުކުރެވޭނެ ކަމަށް ހައި ކޯޓުން ނިންމި މައްސަލަ އަނބުރާ ގެންގޮސްފިއެވެ.
މި މައްސަލަ ހައިކޯޓުން ނިންމީ، އިތުބާރު ކުރެވޭ މަގާމެއްގައި ހުރި އެންވަޔަރަމަންޓް މިނިސްޓްރީގެ ކުރީގެ ނައިބު މުހައްމަދު ރާޣިބް، ކުޑަކުއްޖަކަށް ޖިންސީ ގޯނާކުރި މައްސަލައެއްގައި ދަޢުވާ ރައްދުވާ ފަރާތުގެ ވަކީލަކަށް ވަޑައިގަތުމާ ގުޅިގެންނެވެ. މި ހާދިސާއާ ގުޅިގެން ރައީސް ޑރ. މުޙައްމަދު މުއިއްޒު ވަނީ ރާޣިބް މަގާމުން ވަކިކުރައްވާފައެވެ. ރާޣިބް ވިދާޅުވި ގޮތުގައި މައްސަލަ އަނބުރާ ގެންދަވާފައިވަނީ އޭނާއަކީ ސިޔާސީ މީހަކަށް ނުވާތީއާއި، މައްސަލަ އިތުރަށް ކުރިއަށް ގެންދަން ބޭނުންފުޅު ނުވާތީއެވެ.
މީގެ އިތުރުން، ރާޣިބް ވަނީ ގދ. ތިނަދޫގެ އާބާދީ 10،000 އަށް ވުރެ މަދުނަމަވެސް، ކުރީގެ ސަރުކާރުން އެ ރަށަށް ސިޓީއެއްގެ ދަރަޖަ ދިނުމާ ގުޅޭ ދުސްތޫރީ މައްސަލައެއް ހައިކޯޓަށް ހުށަހަޅުއްވާފައެވެ. މި މައްސަލައާ ގުޅިގެންވެސް ރާޣިބް ވަނީ މަގާމުން ވަކިކުރެވިފައެވެ. "ވަގުތު" އިން ކުރި ސުވާލަކަށް ޖަވާބު ދެއްވަމުން ރާޣިބް ވިދާޅުވީ، އެ މައްސަލަ ހުށަހެޅުއްވީ ގދ. އަށް ނިސްބަތްވާ މީހެއްގެ ހައިސިއްޔަތުން އެކަމުގެ ހަގީގަތް އެނގިވަޑައިގަންނަވާތީ ކަމަށާއި، ރައީސް ސޯލިހް ވަނީ ގާނޫނާ ޚިލާފު ގިނަ ކަންތައްތަކެއް ކުރައްވާފައި ކަމަށެވެ.
