މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) އިން މިއަދު ވަނީ "ވޯލްޑްސް ބިގެސްޓް ގިވްއަވޭ" ގެ ނަމުގައި ދުނިޔޭގެ އެންމެ ބޮޑު ޕްރޮމޯޝަން ހަރަކާތެއް ފަށައިފައެވެ. މި ޕްރޮމޯޝަންގެ ދަށުން ރާއްޖޭގައި ހިލޭ ޗުއްޓީ ހޭދަކުރުމުގެ 52 ފުރުސަތު ހުޅުވާލެވޭނެއެވެ.
އެމްއެމްޕީއާރްސީން މަޢުލޫމާތު ދެއްވިގޮތުގައި، މި ގިވްއަވޭ ހަރަކާތް ކުރިއަށްގެންދާނީ "ވިޒިޓް މޯލްޑިވްސް" ގެ ސޯޝަލް މީޑިއާ ޕްލެޓްފޯމްތަކުގައި ބާއްވާ މަހުން މަހަށް ކުރިއަށްދާ މުބާރާތްތަކެއްގެ ތެރެއިންނެވެ. ކޮންމެ މަހެއްގައިވެސް ގުރުއަތުން ހޮވޭ ނަސީބުވެރި ހަތަރު ފަރާތަކަށް ރާއްޖޭގައި ހިލޭ ޗުއްޓީއެއް ހޭދަކުރުމުގެ ފުރުސަތު ލިބިގެންދާނެއެވެ.
މި ޕްރޮމޯޝަންގެ މައިގަނޑު މަޤްސަދަކީ ދަތުރުފަތުރުކުރުމަށް ޝައުޤުވެރިވާ ފަރާތްތަކުގެ މެދުގައި ސޯޝަލް މީޑިއާގެ ޒަރީއާއިން ޝައުޤުވެރިކަން އުފެއްދުމާއި، މަތީ ފަންތީގެ ޓޫރިސްޓް މަންޒިލެއްގެ ގޮތުގައި ރާއްޖެއަށް ދުނިޔޭގައި އޮތް މަޤްބޫލުކަން އިތުރުކުރުމެވެ. މި ގިވްއަވޭ ހަރަކާތް ކުރިއަށްގެންދާނީ މުޅި ދުނިޔެއަށް ހުޅުވާލައިގެންނެވެ.
ފާހަގަކޮށްލެވޭ ކަމަކީ މިދިޔަ އަހަރު ނިމުނުއިރު ރާއްޖެއަށް ޒިޔާރަތްކުރި ފަތުރުވެރިންގެ އަދަދު ދެ މިލިއަނަށްވުރެ އިތުރުވެ، ރާއްޖޭގެ ޓޫރިޒަމް ދާއިރާގެ އައު ރެކޯޑެއް ޤާއިމްކުރެވިފައިވާކަމެވެ.
