މި ސަރުކާރު ވެރިކަމާ ހަވާލުވުމަށްފަހު މިހާތަނަށް އޮޑިވެރިންނަށް 981 މިލިއަން ރުފިޔާ ދޫކޮށްފައިވާކަމަށް މިފްކޯއިން ބުނެފިއެވެ. ސަރުކާރު ވެރިކަމާ ހަވާލުވިއިރު، މަސްދޯނިތަކުން ކިރުވާފައިވާ މަހަށް އޮޑިވެރިންނަށް ދޭންޖެހޭ 230 މިލިއަނަށްވުރެ ގިނަ ރުފިޔާ އޮތްނަމަވެސް، ސަރުކާރުން ވަނީ އެ ފައިސާ ދީ ހަލާސްކޮށް، ބެކްލޮގް އެއްކޮށް ފިލުވާލާފައެވެ.
މިފްކޯއިން އިތުރަށް ހާމަކުރި ގޮތުގައި، 17 ނޮވެމްބަރ 2023 އިން 28 ޑިސެމްބަރ 2024 ގެ ނިޔަލަށް މިފްކޯއަށް 55,925 މެޓްރިކް ޓަނުގެ މަސް ކިރުވާފައިވެއެވެ. އަދި މިހާރު ކިރުވާ މަހަށް 48 ގަޑިއިރުގެ ތެރޭގައި އޮޑިވެރިންނަށް ފައިސާ ދޫކުރެވެމުންދާކަމަށް ފާހަގަކޮށްފައިވެއެވެ. މި މަސައްކަތުގައި ބޭންކް އޮފް މޯލްޑިވްސްއާއި، މާލީ ވުޒާރާއާއި މަސްވެރިކަމާއި ކަނޑުގެ ވަސީލަތްތަކާބެހޭ ވުޒާރާގެ ފަރާތުން ވަރަށް ބޮޑު އެހީތެރިކަމަކާއި އެއްބާރުލުމެއް ލިބެމުންދާކަމަށް މިފްކޯއިން ބުނެފައިވެއެވެ.
ސަރުކާރުން ދަނީ ރާއްޖޭގެ މަސްވެރިކަމުގެ ސިނާޢަތް ކުރިއަރުވައި ސިންދަފާތުކުރުމަށް ގިނަ މަސައްކަތްތަކެއް ކުރަމުންނެވެ. މިގޮތުން މަސްވެރިކަމުގެ ސިނާޢަތަށް ދިމާވެފައިވާ މައްސަލަތަކަށް ސަރުކާރުގެ ފުރަތަމަ 3 އަހަރުގެ ތެރޭގައި ހައްލު ލިބިގެންދާނެކަމަށް މަސްވެރިކަމާއި ކަނޑުގެ ވަސީލަތްތަކާބެހޭ ވުޒާރާއިން ވަނީ ހާމަކޮށްފައެވެ.
