ރާއްޖެއަށް ކުރިމަތިވި ސުނާމީ ކާރިސާ އިން ދައްކުވައި ދިނީ އެއްބައިވަންތަކަމުގެ ލާމަސީލް މިސާލެއް ކަމަށް ކުރީގެ ރައީސް އިބްރާހިމް މުހައްމަދު ސޯލިހް ވިދާޅުވެއްޖެއެވެ.
އެއްބައިވަންތަ ދުވަހުގެ ހެޔޮ އެދުންތައް ދިވެހިންނަށް އަރިސް ކުރައްވައި ސޯލިހް "އެކްސް" ގައި ކުރެއްވި ޕޯސްޓެއްގައި ވިދާޅުވީ 2004 ވަނަ އަހަރު ދިމާވި ސުނާމީ ކާރިސާގައި ދިވެހިން ދެއްކެވީ އެއްބައިވަންތަކަމާއި އެކަކު އަނެކަކަށް އަޅާލުމާއި އެހީތެރިވުމުގެ ލާމަސީލު މިސާލެއް ކަމަށެވެ.
"މީގެ 20 އަހަރު ކުރިން، ސުނާމީ ކާރިސާގައި ދިވެހިން ދައްކުވައިދިނީ އެއްބައިވަންތަކަމާއި އެކަކު އަނެކަކަށް އަޅާލުމާއި އެހީތެރިވުުމުގެ ލާމަސީލު މިސާލެއް. " ސޯލިހު ވިދާޅުވިއެވެ.
ސޯލިހު ވިދާޅުވެފައިވަނީ ދިވެހިންގެ މެދުގައި އޮންނަ ބަދަހި ގުޅުން އަބަދަށް ދަމަހައްޓަން ޖެހޭނެ ކަމަށެވެ. އަދި އެ ހިތާމަވެރި ކާރިސާގައި އަޅުގަނޑުމެންނާ ވަކިވެދިޔަ އެންމެހާ ބޭފުޅުންނަށް ހެޔޮ ރަޙުމަތް ލެއްވުން އެދި ދުއާ ދަންނަވާފައިވެއެވެ.
ރާއްޖޭގައި ކޮންމެ އަހަރަކުވެސް ގައުމީ އެއްބައިވަންތަކަމުގެ ދުވަހުގެ ގޮތުގައި ފާހަގަކުރަނީ ޑިސެންބަރު މަހުގެ 26 ވަނަ ދުވަހެވެ. މި ދުވަސް ފާހަގަކުރަނީ 2004 ވަނަ އަހަރު ރާއްޖެއަށް ކުރިމަތިވި ސުނާމީ ކާރިސާ އިން ލިބުނު ގެއްލުމުން އަރައިގަތުމަށް އެއްބައެއްގެ ގޮތުގައި ދިވެހިންކުރި މަސައްކަތާއި، ދައްކުވައިދިން އަޚްވަންތަކަން ފާހަގަކުރުމަށެވެ. އަދި އެ ކާރިސާގައި ދުނިޔެ ދޫކުރި މީހުންގެ މަތިން ހަނދާން އާ ކުރުމަކީ ވެސް މިދުވަސް ފާހަގަކުރުމުގެ ބޭނުމެކެވެ.
މި ކާރިސާގައި 82 ދިވެހިން ނިޔާވި އިރު، 26 މީހުން ގެއްލުނެވެ. އަދި 15,000 އަށްވުރެ ގިނަ މީހުން ގެދޮރު ގެއްލި، ނިކަމެތި ހާލުގައި ޖެހުނެވެ.
