ގައުމީ އެއްބައިވަންތަކަމުގެ ދުވަސް ފާހަގަކުރުމުގެ ގޮތުން، މިއަދު ހެނދުނު 9:23ގައި މުޅި ރާއްޖޭގައި ޚާއްޞަ ސުކޫތެއް ގެނެސްފިއެވެ. މި ސުކޫތަކީ 2004 ވަނަ އަހަރުގެ ޑިސެމްބަރު މަހުގެ 26 ވަނަ ދުވަހު ރާއްޖެއަށް ސުނާމީގެ ރާޅު އެރި ގަޑީގައި، އެ ކާރިސާގައި ނިޔާވި އަދި ގެއްލުނު މީހުންގެ ހަނދާނުގައި ގެނެވުނު ސުކޫތެކެވެ.
ވެރިރަށް މާލޭގައި މި ސުކޫތުގެ ރަސްމިއްޔާތު ބޭއްވުނީ ކުރީގެ ހުރަވީ ބިލްޑިންގ ހުރި ބިމުގައެވެ. މި ރަސްމިއްޔާތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާއި، ދައުލަތުގެ ވަޒީރުންނާއި އިސްވެރިންގެ އިތުރުން، އެ ސަރަހައްދުގައި ހުންނަ ސަރުކާރުގެ އޮފީސްތަކާއި މާލޭގެ އެހެނިހެން އޮފީސްތަކުގެ މުވައްޒަފުން ބައިވެރިވިއެވެ. ހަމައެހެންމެ، ރާއްޖޭގެ އެކި ރަށްރަށުގެ ރައްޔިތުންވެސް މި ސުކޫތުގައި ބައިވެރިވިކަން ފާހަގަކުރެވުނެވެ.
ސުކޫތަށްފަހު މުޅި ރާއްޖޭގައި އެއްބައިވަންތަކަމުގެ އަތުގުޅާލުމެއް ބޭއްވުމަށް ހަމަޖެހިފައިވާއިރު، ހަދިޔާ ބަދަލުކުރުމުގެ ޚާއްޞަ ހަރަކާތެއްވެސް ކުރިއަށް ގެންދިއުމަށް ވަނީ ރޭވިފައެވެ. ފާހަގަކޮށްލެވޭ ކަމަކީ، 2005 ވަނަ އަހަރުން ފެށިގެން ކޮންމެ އަހަރެއްގެ ޑިސެމްބަރު މަހުގެ 26 ވަނަ ދުވަސް ފާހަގަކުރަމުން އަންނަނީ ދިވެހިންގެ އެއްބައިވަންތަކަމުގެ ދުވަހުގެ ގޮތުގައި ކަމެވެ. މިއީ ސުނާމީ ކާރިސާގައި ދިވެހިން ދެއްކި އެއްބައިވަންތަކަމުގެ ރީތި ނަމޫނާ ފާހަގަކޮށް، އެ ހަނދާން އާކުރުމުގެ ގޮތުން ކަނޑައެޅިފައިވާ ދުވަހެކެވެ.
މި ދުވަސް ޤައުމީ ފެންވަރެއްގައި ފާހަގަކުރުމުގެ މައިގަނޑު މަޤްޞަދަކީ ސުނާމީ ކާރިސާގައި އަޅުގަނޑުމެންނާ ވަކިވެގެންދިޔަ ލޮބުވެތި އަޚުންނާއި އުޚްތުންގެ ހަނދާން އައުކުރުމާއެކު، އެ ދުވަހު ދިވެހިން ސާބިތުކޮށްދިން އެކުވެރިކަމާއި، އެއްބައިވަންތަކަމާއި، އެއްބައެއްވަންތަކަމުގެ މަތިވެރި ރޫޙު ދިރުވައި އާލާކުރުމެވެ.
