އެއްބައިވަންތަކަމުގެ ދުވަސް ފާހަގަކުރުމުގެ ގޮތުން މުޅި ރާއްޖޭގައި ޚާއްސަ ސުކޫތެއް ބޭއްވުމަށް ހަމަޖެހިފައިވާކަމަށް މިނިސްޓްރީ އޮފް އާޓްސް، ކަލްޗަރ އެންޑް ހެރިޓޭޖުން ހާމަކޮށްފިއެވެ.
2004 ވަނަ އަހަރު ރާއްޖެއަށް ސުނާމީ އެރި ގަޑިކަމުގައިވާ ހެނދުނު 9:23 ގައި ބޭއްވުމަށް ހަމަޖެހިފައިވާ މި ސުކޫތުގެ މާލޭގެ ރަސްމިއްޔާތު އޮންނާނީ ކުރީގެ ހުރަވީ ބިލްޑިންގ ހުރި ބިމުގައެވެ. މި ސުކޫތުގައި ރައީސުލްޖުމްހޫރިއްޔާގެ އިތުރުން ދައުލަތުގެ މިނިސްޓަރުންނާއި އިސްވެރިންނާއި އެ ސަރަހައްދުގައި ހުރި ސަރުކާރުގެ އެންމެހާ އޮފީސްތަކުގެ މުވައްޒަފުން ބައިވެރިވާނެއެވެ. ރަށްރަށުގެ ސުކޫތުގެ އިންތިޒާމުތައް ހަމަޖައްސާނީ އެ ރަށްރަށުގެ ކައުންސިލްތަކުންނެވެ.
މިނިސްޓްރީން އިތުރަށް ހާމަކުރި ގޮތުގައި، ސުކޫތު ނިމުމުން މުޅި ރާއްޖޭގައި އެއްބައިވަންތަކަމުގެ އަތުގުޅާލުމެއް އޮންނާނެއެވެ. މީގެ އިތުރުން، އެންޑީއެމްއޭއިން ސުނާމީގެ ހަނދާންތައް ދައްކުވައިދޭ ފޮޓޯ މައުރަޒެއް ހެނދުނު 11:00 ގައި ބޭއްވުމަށް ވަނީ ހަމަޖެހިފައެވެ.
2004 ވަނަ އަހަރުގެ ސުނާމީ ކާރިސާގައި 82 ދިވެހި ރައްޔިތުން ދުނިޔެ ދޫކުރިއެވެ. އަދި އެތައް ބައެއްގެ ދިރިއުޅުން އެއްކޮށް ބަދަލުވެ، ބައެއް ރަށްރަށުން މީހުން އެހެން ރަށްރަށަށް ބަދަލުކުރަން ޖެހުނެވެ. މި ބޮޑު ކާރިސާއިން އަރައިގަތުމަށް ދިވެހިން ދެއްކި އެއްބައިވަންތަކަމުގެ ރޫހު ފާހަގަކުރުމުގެ ގޮތުން، ކޮންމެ އަހަރެއްގެ ޑިސެމްބަރު 26 ވަނަ ދުވަހަކީ އެއްބައިވަންތަކަމުގެ ދުވަހުގެ ގޮތުގައި ފާހަގަކުރެވެއެވެ.
