ޖުޑީޝަލް ސަރވިސް ކޮމިޝަން (ޖޭއެސްސީ) އިން ރާއްޖޭގެ އެކި ސަރަހައްދުތަކުގައި ހުރި ހަތް މެޖިސްޓްރޭޓް ކޯޓަކަށް އާ ފަނޑިޔާރުން އައްޔަންކޮށްފިއެވެ.
މި އައްޔަންކުރުން ކުރިއަށް ގެންގޮސްފައިވަނީ މި މަހުގެ 18 ވަނަ ދުވަހު ބޭއްވުނު ޖޭއެސްސީގެ 65 ވަނަ ބައްދަލުވުމުގައެވެ. މިގޮތުން ކ. މާފުށި، ލ. މާވަށު، ހއ. ބާރަށު، ބ. ކެންދޫ، ކ. ކާށިދޫ، ބ. ތުޅާދޫ އަދި ގދ. ގައްދޫ މެޖިސްޓްރޭޓް ކޯޓުތަކަށް އައްޔަންކުރެވުނު ފަނޑިޔާރުންގެ ތެރޭގައި ޝިފްނާ އަހުމަދު ސާދިގު، އަހުމަދު ޝާފީ، އަބްދުﷲ ޖައިލަމް، ޖިނާން އަބްދުﷲ، އަލީ އިސްމާއީލް، އިސްމާއީލް މާހިރު އަދި އަހުމަދު އަވްފު އަބްދުއްސަމަދު ހިމެނެއެވެ.
ޖޭއެސްސީން ހާމަކުރި ގޮތުގައި މި މަޤާމުތަކަށް ފަނޑިޔާރުން އައްޔަންކޮށްފައިވަނީ މިދިޔަ އޮކްޓޯބަރު މަހު ކުރެވުނު އިއުލާނާ ގުޅިގެން ކުރިމަތިލި ފަރާތްތަކާ އިންޓަވިއު ކުރުމަށްފަހު، ކޮމިޝަނަށް ލަފާދޭ ކޮމިޓީގެ ލަފާގެ މަތިންނެވެ.
