ޕްރޮސެކިއުޓަރ ޖެނެރަލްގެ އޮފީހުން މިއަދު ހާމަކުރި ގޮތުގައި، ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ފައިސާއަށް ހިޔާނާތްތެރިވި މައްސަލާގައި އެފްއޭއެމްގެ ކުރީގެ ރައީސް ބައްސާމު އާދީލް ޖަލީލްގެ މައްޗަށް އިތުރު ދައުވާތަކެއް ކޯޓަށް ހުށަހަޅާއިފިއެވެ.

ބައްސާމް އެފްއޭއެމްގެ ރައީސްކަމުގައި ހުންނަވަނިކޮށް، އެސޯސިއޭޝަނަށް އެކި ފަރާތްތަކުން ލިބުނު ފައިސާއަށް ހިޔާނާތްތެރިވެފައިވާ ކަމަށް ތުހުމަތުކުރެވެއެވެ. ޚާއްޞަކޮށް، އެފްއޭއެމްއަށް ބޭރުގެ ފަރާތްތަކުން އެހީގެ ގޮތުގައި ލިބުނު ޔޫއެސް ޑޮލަރު އެ އެސޯސިއޭޝަންގެ އިސްވެރިންނާއި، އެސޯސިއޭޝަނާ ގުޅުންހުރި ފަރާތްތަކާއި ކުންފުނިތަކުގެ އެކައުންޓްތަކަށް ޖަމާކޮށް، ނަހަމަގޮތުގައި ބޭނުންކޮށް މަނީ ލޯންޑްރިންގގެ ޢަމަލުތަކެއް ހިންގާފައިވާ ކަމަށް ތުހުމަތު ކޮށްފައިވެއެވެ.

ބައްސާމްގެ މައްޗަށް އުފުލާފައިވާ ދަޢުވާތަކުގެ ތެރޭގައި، އަމީން ކޮންސްޓްރަކްޝަން ޕްރައިވެޓް ލިމިޓެޑްގެ އަމީން އެވެނިއުއިން އެޕާޓްމަންޓެއް ގަތުމަށް އެފްއޭއެމްގެ 1.2 މިލިއަން އެމެރިކާ ޑޮލަރަށް ހިޔާނާތްތެރިވެފައިވާ ކަމުގެ ދަޢުވާ ހިމެނެއެވެ. މި ދަޢުވާ ސާބިތުވެއްޖެނަމަ، އޭނާއަށް 1 އަހަރާއި 7 މަހާއި 6 ދުވަހުގެ ޖަލު ޙުކުމެއް ކުރެވޭނެއެވެ.

އަދި މީގެ އިތުރުން، މަނީ ލޯންޑްރިން އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ޤާނޫނުގެ ދަށުން ވެސް ބައްސާމްގެ މައްޗަށް ދަޢުވާ އުފުލާފައިވެއެވެ. މި ދަޢުވާގައި ބުނެފައިވާ ގޮތުގައި، އަމީން އެވެނިއުގެ ބްލޮކް A ގެ 12 އަދި 13 ވަނަ ފަންގިފިލާގެ ދެ އެޕާޓްމަންޓް (A1205 އަދި A1206) ގަތުމަށް ޖުމްލަ 25 މިލިއަން ރުފިޔާގެ އެއްބަސްވުމެއްގައި ސޮއިކޮށް، އެފްއޭއެމްގެ ޑޮލަރު އެކައުންޓުން އެކި ކުންފުނިތަކަށް ފައިސާ ފޮނުވައި، އެ ފައިސާ އަމީން ކޮންސްޓްރަކްޝަނަށް ދައްކާފައިވާ ކަމަށް ތުހުމަތުކުރެވެއެވެ. މި ދަޢުވާ ސާބިތުވެއްޖެނަމަ، 100,000 ރުފިޔާއާއި 1 މިލިއަން ރުފިޔާއާ ދެމެދުގެ އަދަދަކުން ޖޫރިމަނާކުރުމާއެކު، 5 އަހަރާއި 15 އަހަރާ ދެމެދުގެ މުއްދަތަކަށް ޖަލަށްލެވޭނެއެވެ.

ޕްރޮސެކިއުޓަރ ޖެނެރަލްގެ އޮފީހުން މައްސަލައިގައި އެދިފައިވަނީ ބައްސާމްގެ މުދަލާއި ފައިސާ ދައުލަތަށް ނަގައިދިނުމަށެވެ. އެގޮތުން، ހިޔާނާތުގެ ސަބަބުން އެފްއޭއެމްއަށް ލިބުނު ގެއްލުމުގެ ބަދަލުގެ ގޮތުގައި 1.2 މިލިއަން އެމެރިކާ ޑޮލަރު އަދި ލޯންޑަރކުރި ފައިސާއިން ގަނެފައިވާ އަމީން އެވެނިއުގެ ދެ އެޕާޓްމަންޓް ދައުލަތަށް ނަގައިދިނުމަށް އެދިފައިވެއެވެ.

މި މައްސަލައިގެ ކުރީގެ ބައެއްގެ ތަޙްޤީޤަށްފަހު، 2024 ޖަނަވަރީ 21 ވަނަ ދުވަހު ވަނީ ކްރިމިނަލް ކޯޓަށް މައްސަލަ ހުށަހަޅާފައެވެ. ޕްރޮސެކިއުޓަރ ޖެނެރަލްގެ އޮފީހުން ބުނެފައިވާ ގޮތުގައި، އެ މައްސަލައިގެ އަޑުއެހުންތައް ކޯޓުގައި ކުރިއަށްދާއިރު، މި ޢަމަލުތަކުގައި ބައިވެރިވި އެފްއޭއެމްގެ މުވައްޒަފުންގެ މައްޗަށް ދަޢުވާކުރުމަށް ތައްޔާރުވަމުންދެއެވެ. އަދި މައްސަލައިގެ ތަޙްޤީޤަށް ކުރިއެރުން ލިބޭ މިންވަރަކުން، ހެއްކާއި ޤަރީނާ ވަޒަންކޮށް، އިތުރު ދަޢުވާތައް ކޯޓަށް ހުށަހަޅަމުން ގެންދާނެ ކަމަށްވެސް ބުނެފައިވެއެވެ.