ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެރިކަމުގެ ފުރަތަމަ ދުވަހުން ފެށިގެން ވައްކަމާ ދެކޮޅަށް ތަފާތު ދައްކަވަމުން ގެންދަވާ ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެއެވެ.
ހުޅުމާލެއިން ވަގަށް ގޯތިތައް ވިއްކި މައްސަލައިގައި ހަދާފައިވާ ލިޔެކިޔުންތަކާ ގުޅިގެން އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދާއި ބޯޑު މެންބަރުން ވަނީ ސަސްޕެންޑް ކުރެވިފައެވެ. މި މައްސަލަ މިހާރު ވަނީ ފުލުހުންނާއި އެންޓި ކޮރަޕްޝަން ކޮމިޝަން (އޭސީސީ) އިން ބަލަން ފަށާފައެވެ.
އެކްސްގައި ކުރެއްވި ޕޯސްޓެއްގައި މިނިސްޓަރު ޝިޔާމް ފާހަގަކުރެއްވި ގޮތުގައި ސަރުކާރު ތެރެއިން ހިނގާ ކަމަށް ތުހުމަތުކުރެވޭ ކޮރަޕްޝަނާއި ވައްކަމުގެ މައްސަލަތައް ބަލައި، ވަގުތުން ފިޔަވަޅު އެޅުއްވުމަކީ މީގެ ކުރިން އެއްވެސް ރައީސަކު ކުރައްވަން ކެރިވަޑައިގެންނެވި ކަމެއް ނޫނެވެ.
އަދި ރައީސް މުއިއްޒުގެ ވާހަކަފުޅާއި އަމަލުފުޅު ދިމާވާނެ ކަމަށާއި، ދިވެހި ރައްޔިތުންގެ މުދަލާއި ފައިސާއަށް ޚިޔާނާތްތެރިވުމުގެ އެއްވެސް ޖާގައެއް އެއްވެސް ފަރާތަކަށް ނުދެއްވާނެކަން އިއްޔެގެ އަމަލުފުޅުން ސާބިތުކޮށްދެއްވައިފި ކަމަށް މިނިސްޓަރު ޝިޔާމް ވިދާޅުވިއެވެ.
