ރާއްޖޭގެ ރަށްވެހިކަން ނުލިބޭ ހާލަތުގައި، ވިސާއެއް ނެތި ރާއްޖޭގައި ދިރިއުޅެމުންދާ ފްރާންސްގެ އާއިލާ ބޭނުންވަނީ ރާއްޖެ ދޫކޮށްދާން ކަމަށް މޯލްޑިވްސް އިމިގްރޭޝަނުން މިއަދު ހާމަކޮށްފިއެވެ.
މިހާރު ތ. ވޭމަންޑޫގައި ދިރިއުޅެމުންދާ މި ފްރާންސްގެ 6 މެމްބަރުންގެ އާއިލާ ރާއްޖޭގައި ގަވާއިދާ ހިލާފަށް އުޅެމުންދާތާ 12 އަހަރު ވެފައިވެއެވެ. އެ އާއިލާ ފުރުވާލުމުގެ މަސައްކަތް އިމިގްރޭޝަނުން ކުރަމުންދާއިރު، އާންމުންގެ ފަރާތުން މިކަމާ ގުޅޭގޮތުން ކަންބޮޑުވުން ފާޅުކުރަމުންދެއެވެ. ޔޫތު ފޯ ޔުނިޓީ ނަމަކަށް ކިޔާ ޖަމިއްޔާއަކުން ރޭ އާޓިފިޝަލް ބީޗުގައި އިހުތިޖާޖެއް ބާއްވައި، އެ އާއިލާ ފުރުވާލުމާ ދެކޮޅަށް އަޑުއުފުލައި، އެ މީހުންނަށް ރާއްޖޭގެ ރަށްވެހިކަން ދިނުމަށް ގޮވާލާފައިވެއެވެ.
އިމިގްރޭޝަންގެ މީޑިއާ އޮފިޝަލް ބައެއް މީޑިއާތަކަށް މައުލޫމާތު ދެއްވަމުން ވިދާޅުވެފައިވަނީ، ފްރާންސްގެ އާއިލާއިން ވަނީ ރާއްޖޭގެ ރަށްވެހިކަމަށް އެދިފައެވެ. އަދި ރަށްވެހިކަން ނުލިބޭނަމަ އަމިއްލައަށް ފުރަން ބޭނުންވާކަމަށް އިމިގްރޭޝަނުގައި އެދިފައިވާ ކަމަށްވެސް އެ އޮފިޝަލް ވިދާޅުވިއެވެ. އެ އާއިލާގެ އެއްވެސް ލިޔެކިޔުމެއް ނެތުމުން، މިވަގުތު ކުރިއަށްދަނީ ލިޔެކިޔުންތައް ހަމަކުރުމުގެ މަސައްކަތްތަކެވެ. އަދި އެ މީހުން ފުރުވާލަނީކަމެއް ނުވަތަ ޑީޕޯޓްކޮށްލަނީކަމެއް މި ވަގުތު ކަނޑައެޅިގެން ބުނަން ދަތިކަމަށް އޮފިޝަލް ފާހަގަކުރެއްވިއެވެ.
އިމިގްރޭޝަން ކޮންޓްރޯލާ މުހައްމަދު ޝަމްއާން ވަހީދު ވިދާޅުވިގޮތުގައި، މި މައްސަލަ ބެލުމަށްފަހު އެ އާއިލާގެ އިސް ފަރާތް މިދިޔަ އޮކްޓޯބަރު މަހު އިމިގްރޭޝަނަށް ހާޒިރުކުރެވުނެވެ. އެ ފަރާތްތަކުގެ ޕާސްޕޯޓުގެ މުއްދަތު ހަމަވެފައިވާތީ، މިހާރު ދަނީ އެ މީހުންގެ ދަތުރުފަތުރުގެ ލިޔެކިޔުންތައް ހޯދަމުންނެވެ. މި ލިޔުންތައް ލިބުމާއެކު ވީހާވެސް އަވަހަކަށް އެ އާއިލާ ފޮނުވާލެވޭނެ ކަމަށްވެސް ޝަމްއާން ވިދާޅުވިއެވެ.
ރާއްޖޭގެ ގާނޫނުތަކުގެ ދަށުން ބޭރު ޤައުމުތަކުގެ ރައްޔިތުންނަށް ރާއްޖޭގެ ރަށްވެހިކަން ދިނުމުގެ ފުރުސަތެއް ނޯވެއެވެ.
ކޮމެންޓު ފޮނުވާ