ދަރިވަރުން ބައިވެރިކޮށްގެން ދައުލަތުގެ އެއްވެސް އިދާރާއަކުން ހަރަކާތެއް ހިންގާނަމަ މިނިސްޓްރީގެ ހުއްދަ ހޯދަންޖެހޭނެ ކަމަށް އެޑިއުކޭޝަން މިނިސްޓްރީން ބުނެފިއެވެ. މިކަން ހާމަކޮށްފައިވަނީ، އެމިނިސްޓްރީން އިއްޔެ ނެރުނު ސާކިއުލާއެއްގައެވެ.
ސްޓޭޓް މިނިސްޓަރު އަހްމަދު މުހައްމަދު ސޮއިކުރައްވާފައިވާ މި ސާކިއުލާ ފޮނުވާފައިވަނީ ސަރުކާރުގެ ހުރިހާ އިދާރާތަކަށާއި ސިޓީ އަދި ލޯކަލް ކައުންސިލްތަކަށާއި ކްލަބް، ޖަމްއިއްޔާ އަދި ޖަމާއަތްތަކަށެވެ. މި ސާކިއުލާގައި ބަޔާންކޮށްފައިވާ ގޮތުން ދަރިވަރުން ބައިވެރިކޮށްގެން ހިންގާ ހަރަކާތްތަކަކީ ދުރާލާ ރާވައި، ކޮންމެ އަހަރަކުވެސް ތައްޔާރުކުރާ އެކްޓިވިޓީ ކަލަންޑަރުގައި ހިމަނައިގެން ކުރިއަށް ގެންދަންޖެހޭ ހަރަކާތްތަކެކެވެ.
އެޑިޔުކޭޝަން މިނިސްޓްރީން އަންގާފައިވާ ގޮތުގައި ދަރިވަރުން ބައިވެރިކުރާ ހަރަކާތްތައް ހިންގަންވާނީ ކިޔެވުމަށް ބުރޫ ނާރާ ގޮތަށެވެ. އަދި މިފަދަ ހަރަކާތްތަކަކީ ދިރާސީ އަހަރު ފެށުމުގެ ކުރިން މިނިސްޓްރީގެ ހުއްދަ ހޯދާފައިވާ ހަރަކާތްތަކަށް ވާންޖެހެއެވެ. ހަމައެހެންމެ، ހަރަކާތެއްގައި ދަރިވަރުން ބައިވެރިކުރުމަށް ސްކޫލުތަކާ މުއާމަލާތު ކުރެވޭނީވެސް މިނިސްޓްރީގެ ހުއްދަ ލިބުމަށްފަހުގައެވެ.
މިފަދަ އެންގުމެއް ނެރެން މިނިސްޓްރީން ނިންމީ ބައެއް އިދާރާތަކުން އެކްޓިވިޓީ ކަލަންޑަރުގައި ނުހިމަނައި އަދި މިނިސްޓްރީއާ މަޝްވަރާ ނުކޮށް ތަފާތު ހަރަކާތްތަކާއި މުބާރާތްތައް ބާއްވަމުންދާތީއެވެ. މިގޮތަށް ހަރަކާތްތައް ހިންގުމުން ދަރިވަރުންގެ ކިޔެވުމަށާއި، ޓީޗަރުންނާއި ދަރިވަރުންގެ ނަފްސާނީ އަދި ޖިސްމާނީ ދުޅަހެޔޮކަމަށް އަސަރުކުރާކަން ސާކިއުލާގައި ފާހަގަކޮށްފައިވެއެވެ. އަދި ކުއްލިއަކަށް ރާވާ ހަރަކާތްތަކަކީ ސްކޫލްތަކާއި ބެލެނިވެރިންނަށް މާލީ ބުރައަކަށްވެ، ނުތަނަވަސްކަން އިތުރުވާ ކަމެއްގެ ގޮތުގައިވެސް ސާކިއުލާގައި ފާހަގަކޮށްފައިވެއެވެ.
