ތ.އަތޮޅު ވޭމަންޑޫގައި ދިރިއުޅެމުންދާ ފަރަންސޭސި އާއިލާއެއް ވިސާނެތި އުޅެމުންދާތީ އެމީހުން ފޮނުވާލުމަށް ނިންމާފައިވާ ކަން ސަރުކާރުން ހާމަކޮށްފިއެވެ. މިއާއިލާ ރާއްޖޭގައި އުޅެމުންދާތާ ގިނަ އަހަރުތަކެއް ވަނީ ވެފައެވެ.
އެމީހުންގެ މައްސަލަ މީޑިއާގައި ފެންމަތިވުމާއެކު، އިމިގްރޭޝަންގެ ކޮންޓްރޯލާ ޖެނެރަލް ޝައްމާން މުހައްމަދު ވިދާޅުވެފައިވަނީ އެމީހުންގެ ޓްރެވަލް ޑޮކިއުމަންޓް ލިބުމުން ވީއެންމެ އަވަހަކަށް ފޮނުވާލެވޭނެ ކަމަށެވެ. މި މައްސަލައިގެ މައުލޫމާތު 'އިމިގްރޭޝަން ވޮޗް' އަށް ލިބިފައިވަނީ މިއަހަރުގެ ޖުލައި 18 ގައެވެ. އޭގެފަހުން އޮކްޓޯބަރު 23 ގައި އެމައްސަލާގައި ހިމެނޭ އިސްފަރާތް އިމިގްރޭޝަނަށް ހާޒިރުކުރެވުނެވެ.
ޝައްމާން އިތުރަށް ވިދާޅުވެފައިވަނީ އެ އާއިލާގެ ޕާސްޕޯޓުތަކުގެ މުއްދަތު ހަމަވެފައިވާތީ، އެމީހުން ފުރުވާލުމަށް ބޭނުންވާ ޓްރެވަލް ޑޮކިއުމަންޓް ހޯދުމުގެ މަސައްކަތް ދިވެހި ހާރިޖިއްޔާއާ ގުޅިގެން ކުރިއަށްދާ ކަމަށެވެ. އަދި ޤާނޫނާ ޚިލާފަށް ރާއްޖޭގައި އުޅުމުގެ ފުރުސަތު އެއްވެސް ފަރާތަކަށް ނުދެވޭނެ ކަމަށްވެސް އޭނާ ވިދާޅުވެފައިވެއެވެ.
އެނގިފައިވާ ގޮތުގައި މި އާއިލާ އެރަށުގައި ދިރިއުޅެމުންދާތާ 4 ވަރަކަށް އަހަރު ވެދާނެއެވެ. އެމީހުން ދިރިއުޅެމުންދަނީ މަސްވެރިކަމުން ލިބޭ އާމްދަނީންނެވެ. މީގެ ކުރިން އެމީހުން ދިރިއުޅެފައިވަނީ އެހެން ރަށެއްގައެވެ. އެރަށު ބައެއް ރައްޔިތުން ހާމަކޮށްފައިވާ ގޮތުގައި އެ އާއިލާގެ ފަރާތުން އެއްވެސް އުނދަގުލެއް ކުރިމަތިވާކަން ފާހަގައެއް ނުކުރެވެއެވެ.
ބައެއް މީޑިއާތަކުން ރިޕޯޓްކޮށްފައިވާ ގޮތުގައި މި އާއިލާ ފަރަންސޭސިވިލާތަށް ދާން ބޭނުންނުވަނީ އެމީހުންގެ ފުރާނައަށް ނުރައްކާވެދާނެތީއެވެ. މި އާއިލާގައި ދެމަފިރިންނާއެކު 5 ދަރިން ހިމެނެއެވެ. އަދި އެންމެންނަކީވެސް މުސްލިމުންނެވެ.
ކޮމެންޓު ފޮނުވާ