އަލިފާނުގެ ހާދިސާއަކާ ގުޅިގެން ހައުސިން މިނިސްޓްރީ، ކޮންސްޓްރަކްޝަން މިނިސްޓްރީ އަދި އެންވަޔަރަމަންޓް މިނިސްޓްރީގެ މަސައްކަތްތައް ދަރުބާރުގެއަށް ބަދަލުކުރެވިއްޖެއެވެ.
މި ހާދިސާއާ ގުޅޭގޮތުން މިއަދު ދަރުބާރުގޭގައި ބޭއްވުނު ނޫސްވެރިންގެ ބައްދަލުވުމެއްގައި ކޮންސްޓްރަކްޝަން މިނިސްޓަރު ޑރ. މުއްތަލިބް ވިދާޅުވި ގޮތުގައި، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިރުޝާދުގެ ދަށުން، މި ތިން ވުޒާރާގެ މަސައްކަތްތައް ދަރުބާރުގެއަށް ބަދަލުކުރުމުގައި ސަރުކާރުގެ ގިނަ އެސްއޯއީތަކާއި، ވުޒާރާތަކާއި، އަމިއްލަ ފަރާތްތަކާއި އަދި ކުންފުނިތަކުގެ ފުރިހަމަ އެއްބާރުލުން ލިބެމުންދެއެވެ.
މިނިސްޓަރު އިތުރަށް ވިދާޅުވި ގޮތުގައި މާދަމާއިން ފެށިގެން މި ތިން ވުޒާރާއިން ވެސް ކުރިން ދެމުންދިޔا މުހިއްމު ޚިދުމަތްތައް އަލުން ފޯރުކޮށްދޭން ފެށޭނެއެވެ. އަދި މި މަސައްކަތުގައި އެހީތެރިވަމުންދާ އެންމެހާ ފަރާތްތަކަށް މިނިސްޓަރު ޝުކުރު އަދާކުރެއްވިއެވެ.
އަމީނީ މަގުގައި ހުންނަ ހައުސިން މިނިސްޓްރީގެ އިމާރާތުގައި ފެށުނު މި އަލިފާނުގެ ހާދިސާގައި، ކޮންސްޓްރަކްޝަން މިނިސްޓްރީ ވެސް ހިންގަމުން އައި އެ އިމާރާތާއި، ޖެހިގެން ހުރި އެންވަޔަރަމަންޓް މިނިސްޓްރީގެ އިމާރާތަށް ވެސް ވަނީ ބޮޑެތި ގެއްލުންތަކެއް ލިބި، ބޭނުން ނުކުރެވޭ ވަރަށް އަނދައިފައެވެ. ނަމަވެސް މި ހާދިސާގައި އެއްވެސް މީހަކަށް ގެއްލުމެއް ލިބިފައެއް ނުވެއެވެ.
