ދިވެހި ސަރުކާރުގެ ހިލޭ ބޭސްފަރުވާގެ ނިޒާމު، އާސަންދައިގެ ހިދުމަތް އިތުރަށް ފުޅާކުރުމުގެ ގޮތުން އެކުވެރި އަރަބި އިމާރާތުގެ ދުބާއި އާއި ތައިލެންޑްގެ ބެންކޮކްގެ ހޮސްޕިޓަލްތަކަކާއެކު އެއްބަސްވުމެއްގައި ސޮއިކޮށްފިއެވެ.
އާސަންދަ އޮފީހުން މިކަން އިއުލާންކުރަމުން ބުނެފައިވަނީ މި އެއްބަސްވުން ސޮއިކުރެވިފައިވަނީ ދުބާއިގެ ބުރްޖީލް މެޑިކަލް ސިޓީ އާއި، ބެންކޮކްގެ ވޯލްޑް މެޑިކަލް ހޮސްޕިޓަލް އަދި ބެންކޮކް ހޮސްޕިޓަލާ އެކުގައި ކަމަށެވެ. މި އެއްބަސްވުމުގެ ދަށުން އަންނަ އަހަރުގެ ޖެނުއަރީ 15 އިން ފެށިގެން ކަނޑައެޅޭ އުސޫލުތަކެއްގެ ދަށުން މި ހޮސްޕިޓަލްތަކަށް ބަލިމީހުން ފޮނުވަން ފެށޭނެއެވެ.
އާސަންދަ ސްކީމުގެ ދަށުން ބޭސްފަރުވާ ހޯދަން ބަލިމީހުން ފޮނުވުމަށް މިއަދުވަނީ ތައިލޭންޑުގެ ދަ ވޯރލްޑް މެޑިކަލް ހޮސްޕިޓަލާއެކު އާސަންދަ ކުންފުނީގެ ފަރާތުން އެއްބަސްވުމެއްގައި ސޮއިކޮށްފައި. pic.twitter.com/H3dvAKBntb
— Aasandha Company Ltd (@AasandhaLtd) December 10, 2024
މިކަމާ ގުޅޭގޮތުން ރައީސް ޑރ. މުހައްމަދު މުއިއްޒު ވަނީ މިދިޔަ ޖެނުއަރީ މަހު ޗައިނާއަށް ކުރެއްވި ދަތުރުފުޅު ނިންމަވާލެއްވުމަށްފަހު ވާހަކަފުޅު ދައްކަވާފައެވެ. މިހާތަނަށް އާސަންދައިގެ ދަށުން ރާއްޖެއިން ބޭރަށް ބަލިމީހުން ފޮނުވަމުން އައީ ހަމައެކަނި އިންޑިއާ އަދި ސްރީލަންކާއަށް ކަމަށާއި، މިހާރު މި ހިދުމަތް އިތުރަށް ފުޅާކުރުމަށް ވަނީ ނިންމާފައެވެ.
އާސަންދަ ސްކީމުގެ ދަށުން ބޭސްފަރުވާ ހޯދަން ބަލިމީހުން ފޮނުވުމަށް މިއަދުވަނީ ޑުބާއީގެ ބުރްޖީލް މެޑިކަލް ސިޓީ އާއެކު އާސަންދަ ކުންފުނީގެ ފަރާތުން އެއްބަސްވުމެއްގައި ސޮއިކޮށްފައި. pic.twitter.com/fBPSqCFfoG
— Aasandha Company Ltd (@AasandhaLtd) December 10, 2024
ރައީސް އިތުރަށް ވިދާޅުވެފައިވަނީ އާސަންދައަކީ ހަމައެކަނި ވަކި ދިމާލަކަށް، ވަކި ގައުމެއްގެ މެޑިކަލް ފެސިލިޓީތަކަށް އެކަނި ބޭނުންކުރެވޭ އެއްޗަކަށް ނަހައްދަވާ، އެއަށްވުރެ ފެންވަރު ރަނގަޅު ގައުމުތަކަށް ފުޅާކުރައްވާނެ ކަމަށެވެ. އަދި މި ގައުމުތަކަށް ބޭސްފަރުވާއަށް ދާ މީހުންގެ ހުރުމާއި، ކެއުމާއި އެހެނިހެން ހަރަދުތައްވެސް ހަމަޖައްސަވައިދެއްވާނެ ކަމަށް ރައީސް ވަނީ ވިދާޅުވެފައެވެ. މިގޮތުން ރާއްޖޭގެ ހެލްތު ފެސިލިޓީތައް ތަރައްގީވަންދެން، މިހާރަށްވުރެ ފެންވަރު ރަނގަޅު ދުބާއި އަދި ބެންކޮކްގެ ހޮސްޕިޓަލްތަކަށް އެކަމޮޑޭޝަން އެކްސްޕެންސަސް ލިބޭގޮތަށް އާސަންދައިން ކަވަރުކޮށްދޭނެ ކަމަށް ރައީސް ވަނީ އިއުލާނު ކުރައްވާފައެވެ.
