އެމްޑީޕީގެ އެކްޓިވިސްޓަކު ރައީސް މުއިއްޒަށް އިންޒާރު ދިން މައްސަލަ ފުލުހުން ބަލަން ފަށައިފިއެވެ. މި އިންޒާރު ދިނީ ހުކުރު ދުވަހުގެ ރޭ ކުޅުދުއްފުށި ސިޓީގައި އެމްޑީޕީން ބޭއްވި ޖަލްސާގައި އެ ޕާޓީގެ އެކްޓިވިސްޓް އަބްދުއްރަހްމާން އިސްމާއިލެވެ.
އެރޭ ޖަލްސާގައި ވާހަކަދައްކަމުން އަބްދުއްރަހްމާން ވަނީ ސަރުކާރާއި ރައީސް މުއިއްޒަށް ވަރަށް ބޮޑަށް ފާޑުކިޔާފައެވެ. އެގޮތުން އޭނާ ބުނެފައިވަނީ މުހައްމަދު އަމީން ދުންފަތާ ކުޅުނު ފަދައިން ރައީސް މުއިއްޒު މިހާރު ކުޅެމުންދަނީ ޤާނޫނުއަސާސީއާ ކަމަށެވެ. އޭނާ އިތުރަށް ބުނެފައިވަނީ މުހައްމަދު އަމީނަށް ވީ ގޮތް ދިވެހި ރައްޔިތުންނަށް ފެނިގެންދާނެ ކަމަށާއި، ޤާނޫނުއަސާސީއާ ކުޅޭނަމަ "ރީތި ކެއްސެއް" ލިބިގެންދާނެ ކަމަށެވެ.
މުހައްމަދު އަމީން ވެސް ކުޅުނީ ދުންފަތާ، މީނަ (ރައީސް މުއިއްޒު) މި ކުޅެނީ ޤާނޫނުއަސާސީއާ، މުޙައްމަދު އަމީންއަށް ވީ ގޮތް ވެސް ފެނިގެންދާނެ ދިވެހި ރާއްޖޭގެ ލޮބުވެތި ރައްޔިތުންނަށް، އެހެންވީމަ ޤާނޫނުއަސާސީ ކުޅޭ ކަމަށްވާ ނަމަ، ފެންނާނެ ރީތި ކެއްސެއް ލިބިގެންދާނެ.
އަބްދުއްރަޙްމާން ބުންޏެވެ.
ފުލުހުން ބުނެފައިވާ ގޮތުގައި މި މައްސަލަ ފުލުހުންގެ ސަމާލުކަމަށް އައުމާ ގުޅިގެން، އެކަމާ ގުޅޭ ގޮތުން ބަލަންޖެހޭ ކަންކަން މިހާރު ދަނީ ބަލަމުންނެވެ. މި މައްސަލަ ކުރިމަތިވެފައިވަނީ ޤާނޫނުއަސާސީގެ ދިފާއުގައި އެމްޑީޕީން މި މަހުގެ 10 ވަނަ ދުވަހުގެ ރޭ މާލޭގައި ބޮޑު އެއްވުމެއް ބޭއްވުމަށް ތައްޔާރުވަމުން ދަނިކޮށެވެ.
މިދިޔަ ހަފުތާގައި "ކައްޒާބު" އަށް ނިސްބަތްކޮށް ސޯޝަލް މީޑިއާގައި ކުރި ޕޯސްޓެއްގައި މީހަކަށް އިންޒާރުދީ ބިރުދެއްކި މައްސަލައެއްގައި މީހަކު ވަނީ ފުލުހަށް ހާޒިރުކޮށްފައެވެ.
