މޫސުމީ ބަދަލުތަކަށް ނާޒުކު ގައުމުތަކަށް އެހީތެރިކަން ފޯރުކޮށްދިނުމަށް ރާއްޖެއިން މިއަދު އައިސީޖޭގައި ގޮވާލައިފިއެވެ. ރާއްޖެއިން މިކަމަށް ގޮވާލީ އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) ގައި ރާއްޖެއިން މިއަދު ދިން ބަޔާނެއްގައެވެ.
އެޓާނީ ޖެނެރަލްގެ އޮފީހުން ބުނެފައިވާ ގޮތުގައި، މޫސުމަށް އަންނަ ބަދަލުތަކުގެ މައްސަލައިގައި ގައުމުތަކުގެ މަސްއޫލިއްޔަތުތަކާ ގުޅޭގޮތުން އދ. އާންމު މަޖިލިހުން އައިސީޖޭގެ އިސްތިޝާރީ ލަފައަކަށް އެދި ހުށަހެޅި މައްސަލައިގެ އަޑުއެހުމުގައި ރާއްޖެއިން ބައިވެރިވެ ބަޔާނެއް ދީފައިވާ ކަމުގައެވެ.
ރާއްޖެ ތަމްސީލުކުރައްވަމުން އެޓާނީ ޖެނެރަލް އަހްމަދު އުޝާމް ވާހަކަފުޅު ދައްކަވަމުން، މޫސުމަށް އަންނަ ބަދަލުތަކުގެ މައްސަލައިގައި ކެނޑިނޭޅި ވަކާލާތު ކުރެއްވުމުގައި ރައީސް ޑރ. މުހައްމަދު މުއިއްޒުގެ އިސްނެންގެވުން ފާހަގަކުރެއްވިއެވެ. އަދި މޫސުމަށް އަންނަ ބަދަލުތަކުގެ ސަބަބުން ދިގު މުއްދަތެއްގެ ތެރޭގައި ކުރާ އަސަރުތަކަށް ރާއްޖެ ނާޒުކުކަން ފާހަގަކުރައްވައި، އެ އަސަރުތަކުގެ ސަބަބުން ދިވެހި ރައްޔިތުން ދިރިއުޅެމުންދާ ރަށް ބަދަލުކުރަން ޖެހުމަކީ ދިވެހި ސަރުކާރުން ދެކޮޅު ކަމެއްކަންވެސް ފާހަގަކުރެއްވިއެވެ.
ރާއްޖެ ތަމްސީލުކުރި ބައިނަލްއަގުވާމީ ވަކީލުން ހުށަހެޅުއްވި ބަޔާންތަކުގައި، ތިމާވެއްޓާ ބެހޭ ބައިނަލްއަގުވާމީ ގާނޫނުތަކުގެ ދަށުން ރާއްޖެ ފަދަ ތަރައްގީވަމުން އަންނަ ގައުމުތަކަށް އެހީތެރިކަން ފޯރުކޮށްދިނުމަށް އޮންނަ ޒިންމާއަށް އަލިއަޅުވާލެވުނެވެ. މީގެއިތުރުން، ކަސްޓަމަރީ އިންޓަނޭޝަނަލް ލޯގެ ދަށުން ގައުމުތަކަށް އެއްބާރުލުން ދިނުމަށް އޮންނަ ޒިންމާވެސް ތަފުސީލުކޮށް ބަޔާންކުރެވުނެވެ.
އޭޖީ އޮފީހުގެ ބަޔާނުގައި އިތުރަށް ފާހަގަކޮށްފައިވަނީ، މޫސުމަށް އަންނަ ބަދަލުތަކުގެ ސަބަބުން ކުރާ ނޭދެވޭ އަސަރުތަކުން އަރައިގަތުމަށް ތަރައްގީވަމުން އަންނަ ކުދި ޖަޒީރާ ގައުމުތަކަށް އެހީ ފޯރުކޮށްދިނުމަކީ ބައިނަލްއަގުވާމީ މުޖުތަމައުގެ މަސްއޫލިއްޔަތެއްކަމެވެ. އަދި މި މައްސަލައިގައި ރައްޔިތުންގެ ހައްގުގައި ވަކާލާތު ކުރުމުގައި އާއި ބައިނަލްއަގުވާމީ މުޖުތަމައާ ގުޅިގެން މަސައްކަތް ކުރުމުގައި ދިވެހި ސަރުކާރުން ސާބިތުކަމާއެކު ދެމިހުންނާނެކަމުގެ ޔަގީންކަންވެސް ދީފައިވެއެވެ.
ކޮމެންޓު ފޮނުވާ