ހެލްތު މިނިސްޓްރީން އިއުލާނުކޮށްފައިވާ ގޮތުގައި، ދުންފަތުގެ އިސްތިއުމާލު ކުރުމުން ދުރުހެލިވާން ބޭނުންވާ ފަރާތްތަކަށް އެހީތެރިވުމަށްޓަކައި ސިޒޭޝަންގެ ހިދުމަތް ދިނުމުގެ ގޮތުން ކުއިޓް ލައިން ހިދުމަތް ފެށުމަށް ނިންމައިފިއެވެ.
ހެލްތު މިނިސްޓްރީގައި މިއަދު ބޭއްވުނު ނޫސްވެރިންގެ ބައްދަލުވުމުގައި، ހެލްތު މިނިސްޓަރު އަބްދުالله ނާޒިމް އިބްރާހިމް ވިދާޅުވި ގޮތުގައި، މި މަހުގެ 8 ވަނަ ދުވަހުން ފެށިގެން 24 ގަޑިއިރު ހިދުމަތް ލިބޭނެ ކުއިޓް ލައިން (1676) ވަނީ ގާއިމުކޮށްފައެވެ.
މިނިސްޓަރު ނާޒިމް އިތުރަށް ވިދާޅުވި ގޮތުގައި، ދުންފަތާ ދުރުވުމަށް ބޭނުންވާ ނިކޮޓިން ޕެޗު އަދި ގަމް ފަދަ ތަކެތި އާސަންދައިން ލިބޭނެ ގޮތް ހަމަޖައްސާފައިވެއެވެ. އަދި ސިއްހީ ހިދުމަތްދޭ ހުރިހާ ތަނެއްގައި، ސިއްހީ ހިދުމަތް ދިނުމުގެ ގާނޫނުގެ ދަށުން ޕްރިވެންޓިވް ހެލްތު ކެއާގެ ހިދުމަތެއްގެ ގޮތުގައި ސިޒޭޝަންގެ ހިދުމަތް ދެވޭނެއެވެ. މީގެއިތުރުން، ކައުންސިލުތަކުން އިސްނަގައިގެން ރަށު އަދި އަތޮޅު ފެންވަރުގައި ހިންގާ ދުންފަތް ކޮންޓްރޯލް ކުރުމުގެ މަސައްކަތަށް ސަރުކާރުން އެހީތެރިކަން ފޯރުކޮށްދޭނެ ކަމަށްވެސް ވިދާޅުވިއެވެ.
ރައީސް މުހައްމަދު މުއިއްޒުގެ އިރުޝާދުގެ ދަށުން، ޑަބްލިއުއެޗްއޯގެ އެހީތެރިކަމާއެކު ދުންފަތް ކޮންޓްރޯލު ކުރުމަށް ފަސް އަހަރުގެ ޕްލޭނެއް އެކުލަވާލުމުގެ މަސައްކަތް މިހާރު ވަނީ ފެށިފައެވެ. މި މަސައްކަތުގެ ތެރެއިން، މިދިޔަ އޮކްޓޫބަރު 17 ގައި ރައީސް ވަނީ ރާއްޖޭގެ ހުރިހާ ރަށަކާއި ސިޓީތަކުގައި ޓޮބޭކޯ ސިޒޭޝަން ކްލިނިކުތައް ގާއިމްކުރުމަށް ނިންމަވާފައެވެ. އަދި އެސްޓީއޯ މެދުވެރިކޮށް، ދުންފަތުގެ އިސްތިއުމާލުކުރުން ހުއްޓާލަން ބޭނުންވާ ފަރާތްތަކަށް ބޭނުންވާ ބޭސް ރާއްޖޭގެ ހުރިހާ ސިޓީތަކާއި އަތޮޅު ހޮސްޕިޓަލްތަކުން ލިބޭނެ އިންތިޒާމު ހަމަޖެއްސުމަށްވެސް ވަނީ ނިންމަވާފައެވެ.
