ސަރުކާރުން އައު އިސްނެގުމެއްގެ ދަށުން ދުންފަތާ ދުރުވާން ބޭނުންވާ ފަރާތްތަކަށް އެހީތެރިވުމަށްޓަކައި "ކުއިޓް ލައިން" ގެ ނަމުގައި ޚާއްސަ ހޮޓްލައިން ޚިދުމަތެއް ތަޢާރަފްކޮށްފިއެވެ.
ރޯޝަނީ ބިލްޑިންގގައި ބޭއްވުނު ނޫސްވެރިންގެ ބައްދަލުވުމުގައި ހެލްތު މިނިސްޓަރު އަބްދުﷲ ނާޒިމް އިބްރާހީމް ހާމަކުރެއްވި ގޮތުގައި، މި ހޮޓްލައިން ޚިދުމަތް 1676 ނަންބަރުން 24 ގަޑިއިރު ލިބެން ހުންނާނެއެވެ. އަދި ދުންފަތާ ދުރުވުމަށް ބޭނުންވާ ނިކޮޓިން ޕެޗް އަދި ގަމްގެ އިތުރުން އެހެނިހެން ފަރުވާތައް ވެސް އާސަންދައިގެ ދަށުން ލިބޭނެ އިންތިޒާމު ހަމަޖައްސާފައިވާ ކަމަށާއި، މި ޚިދުމަތް ދިނުމަށް ބޭނުންވާ ފަންނީ މުވައްޒަފުން ވަނީ ތަމްރީނުކޮށްފައެވެ.
މީގެއިތުރުން ސަރުކާރުން ވަނީ ރާއްޖޭގެ ހުރިހާ ރަށެއްގައި "ޓޮބޭކޯ ސިޒޭޝަން ކްލިނިކް"ތައް ގާއިމުކުރުމަށް ނިންމައި، މި ޚިދުމަތް ކުރިއަށް އޮތް ދެތިން މަހުގެ ތެރޭގައި ފެށުމަށް ރޭވިފައިވެއެވެ. މި މަސައްކަތުގެ ތެރެއިން އިޖުތިމާއީ ގޮތުން ހަރަކާތްތެރިވާ ފަރާތްތަކާއި ދުންފަތުގެ އިސްތިއުމާލުނުކުރާ ރަށްރަށް ފާހަގަކޮށް، އެފަދަ ރަށްރަށުގެ އިޖުތިމާއީ ކަންކަމަށް މާލީ އެހީތެރިކަން ފޯރުކޮށްދިނުމަށްވެސް ނިންމާފައިވެއެވެ.
ދުންފަތުގެ މައްސަލައަށް ދާއިމީ ހައްލެއް ހޯދުމަށް، ރައީސް ޑރ. މުހައްމަދު މުއިއްޒު ވަނީ ކުރިއަށް އޮތް ހަތަރު އަހަރުގެ ތެރޭގައި ރަނގަޅު ނަތީޖާއެއް ޙާސިލުކުރެވޭނެ މާސްޓާ ޕްލޭނެއް އެކުލަވާލުމަށް ނިންމަވާފައެވެ. މި ގޮތުން ދުންފަތުގެ ބާވަތްތަކަށް ނަގާ ޑިއުޓީ ބޮޑުކުރުމަށް ޤާނޫނަށް ބަދަލު ގެނެސް، ސިނގިރޭޓާއި ބިޑީގެ އިމްޕޯޓް ޑިއުޓީގެ ސްޕެސިފިކް ރޭޓް ތިން ރުފިޔާއިން އަށް ރުފިޔާއަށް މަތިކޮށް، "އެޑްވެލޮރަމް ރޭޓް" 50 ޕަސެންޓަށް ބޮޑުކުރުމަށް ނިންމާފައިވެއެވެ.
ސަރުކާރުން ބުނެފައިވަނީ މި ފިޔަވަޅުތަކަކީ ދުންފަތުގެ އިސްތިއުމާލު ކުރުން މަދުކޮށް، ދުންފަތާ ދުރުވެ ދުޅަހެޔޮ މުޖުތަމައެއް ބިނާކުރުމަށް އެޅޭ މުހިންމު ފިޔަވަޅުތަކެއް ކަމަށާއި، މި މަސައްކަތްތަކުން ރައްޔިތުންގެ ސިއްހަތަށް ރަނގަޅު އަސަރުތަކެއް ކުރާނެ ކަމަށް އުންމީދުކުރެވޭ ކަމުގައެވެ.
