މާލޭގައި އާންމު އުނދަގޫކޮށް މާރާމާރީ ހިންގުމުގެ މައްސަލައެއްގައި ފުލުހުންގެ ދައުރު އަދާކުރުމަށް ހުރަސް އަޅާ ފުލުހެއްގެ ގައިގާ ޖަހާ މާރާމާރީ ހިންގުމުގެ ތުހުމަތުގައި މެދު އުމުރުގެ އަންހެނެއް ހައްޔަރުކޮށްފިއެވެ. މި މައްސަލައިގައި ކޯޓުން ވަނީ އޭނާ 15 ދުވަހުގެ މުއްދަތަށް ބަންދުގައި ބެހެއްޓުމަށް އަމުރުކޮށްފައެވެ.
ކޯޓަށް ހުށަހެޅުނު މައުލޫމާތުތަކަށް ބަލާއިރު، ފުލުހުން އާންމު އުނދަގޫ ކުރަމުންދާ މީހަކަށް ނަސޭހަތްތެރިވުމަށް މަސައްކަތްކުރި ވަގުތު، އެ އަންހެން މީހާ ވަނީ ފިލަން މަސައްކަތްކޮށް، ފުލުހެއްގެ ގައިގައި ޖަހައި އަދި ދަތް އަޅާފައެވެ.
ނަމަވެސް ކޯޓުގައި އެ އަންހެން މީހާ ބުނެފައިވަނީ އޭނާއަކީ "ބޯ ސަކަރާތް" މީހެއް ކަމަށާއި، މި ހާދިސާގައި ފުލުހެއްގެ ގައިގައި ޖެހުނު ކަމެއް ނުވަތަ ދަތް އެޅުނު ކަމެއް ހަނދާން ނެތް ކަމަށެވެ. މި މައްސަލައިގައި އޭނާގެ މައްޗަށް ކުރެވޭ ތުހުމަތުތަކުގެ ތެރޭގައި ފުލުހުންގެ ދައުރު އަދާކުރުމަށް ހުރަސް އެޅުމާއި، މާރާމާރީ ހިންގުމާއި، އާންމު އުނދަގޫ ކުރުން ހިމެނެއެވެ.
