ޔުނައިޓެޑް އަރަބް އެމިރޭޓްސް (ޔޫއޭއީ) އަކީ ރާއްޖޭގެ ތަރައްގީގައި މުހިންމު ބައިވެރިއެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް އެގޮތަށް ވިދާޅުވީ ޔޫއޭއީގެ ގައުމީ ދުވަހުގެ މުނާސަބަތުގައި އެގައުމުގެ ރައީސް، ޝައިހް މުހައްމަދު ބިން ޒާއިދް އަލް-ނަޙްޔާން އާއި އެގައުމުގެ ނައިބުރައީސް ޝައިޚް މުޙައްމަދު ބިން ރާޝިދު އަލް-މަޚްތޫމް އަށް ފޮނުއްވި ތަހުނިޔާ މެސެޖްގައެވެ.
ދެ ބޭފުޅުންނަށް ވަކިވަކިން ރައީސް ފޮނުއްވި މެސެޖްގައި އެމަނިކުފާނު ވަނީ ދެގައުމުގެ މެދުގައި އޮތް ޒަމާންވީ ރަހުމަތްތެރިކަމުގެ މައްޗަށް އަލިއަޅުއްވާލައްވާފައެވެ. އަދި އެ ގައުމަކީ ރާއްޖޭގެ ތަރައްގީގައި މުހިންމު ބައިވެރިއެއް ކަމަށާއި، އެގުޅުން އިތުރަށް ހަރުދަނާކުރުމަށް ދރާއްޖެއިން އިސްކަންދެއްވާކަމަށްވެސް ރައީސް ވިދާޅުވެފައި ވެއެވެ.
ރާއްޖެއަށް އެހީތެރިކަން ފޯރުކޮށްދެވެން އޮތް ކޮންމެ ދާއިރާއަކުން އެހީތެރިވުމަށް ޔޫއޭއީ ތައްޔާރަށް އޮތް ކަމުގެ ޔަގީންކަން މީގެ ކުރިން އެގައުމުން ވަނީ ދީފައެވެ. އެގައުމުން އެ ޔަގީންކަން ދީފައިވަނީ އދ. ގެ އާންމު މަޖިލީހުގެ 79 ވަނަ ސެޝަންގެ ހަވާސާގެ ތެރެއިން ރައީސް ޑރ، މުހައްމަދު މުއިއްޒު އާއި ޔޫއޭއީގެ ބޮޑުވަޒީރުގެ ނައިބު އަދި ޚާރިޖީ ވަޒީރު ހިޒް ހައިނަސް، ޝައިޚް ޢަބްދުﷲ ބިން ޒާއިދު އާލް ނަހްޔާނާ ހިއްސާ ކުރައްވައި ދެއްކެވި ވާހަކަފުޅުގެ ތެރެއިންނެވެ.
